Монгол Улсын бүх иргэнийг халдварт болон халдварт бус өвчнөөс урьдчилан сэргийлэх эрт илрүүлэх үзлэг, шинжилгээ, оношилгоонд хамруулах ажил тавдугаар сарын 1-нээс орон даяар эхэлсэн билээ. Эрт илрүүлэг шинжилгээ бүтэн жилийн турш үргэлжлэх юм. Тус шинжилгээнд иргэдийг хэзээ, хаана, хэрхэн шинжилгээнд хамруулах тухай хуваарь гаргаж, хуваарийг өрхийн эрүүл мэндийн төвөөс урилга илгээх байдлаар зохион байгуулж буй. Тэгвэл бид урьдчилан сэргийлэх үзлэг шинжилгээнд иргэд хэрхэн хамрагдаж байгаа талаар Улсын Нэгдүгээр Төв Эмнэлгээс сурвалжиллаа.

Нас насны онцлогт хамааруулаад өөр шинжилгээ хийнэ

Улсын нэгдүгээр төв эмнэлэг дээр Сүхбаатар дүүргийн 1-6 дугаар хорооны иргэд хамрагдах боломжтой. Иргэдийн наснаас шалтгаалан өөр өөр шинжилгээ хийх аж. Тухайлбал, 0-17 насны хүүхдэд зургаан төрлийн үзлэг, шинжилгээ хийх бол 18-30, 31-ээс дээш насны иргэдээс нийт 19 төрлийн шинжилгээ авах юм. Үзлэг шинжилгээнд хамрагдахдаа иргэн хоёр өдөрт багтан бүх шинжилгээнд хамрагдах боломжтой.

Үзлэг шинжилгээ тогтсон хуваарийн дагуу хэрхэн явагдаж байгаа талаар УНТЭ эрүүл мэндийг дэмжих төвийн дарга Э.Баясгалан " УНТЭ-ийн Эрүүл мэндийг дэмжих төв нь 17 кабинетаар үзлэг хийж, есөн төрлийн лабораторийн шинжилгээ, дүрс оношилгоог  хийдэг. Манай эмнэлэг өдөрт 60-70 хүнд үзлэг шинжилгээ хийх төлөвлөгөөтэй ажиллаж байна. Иргэд сүүлийн дөрвөн жилийн хугацаанд эрүүл мэндийн даатгал төлсөн байх шаардлагатай. Үзлэг шинжилгээнд хамрагдаж буй хүмүүс даатгалаа төлөөгүйгээс шалтгаалан буцах тохиолдол гарч байгаа. Тиймээс заавал даатгалаа төлж байж бүх нийтийн урьдчилан сэргийлэх үзлэг шинжилгээнд хамрагдах боломжтой гэдгийг хэлмээр байна. Мөн иргэд товлолт өдрөө ирээгүй болон өөр дүүргийн иргэдэд үйлчлэх боломжгүй тиймээс заавал товлолт өдөр буюу урилгын дагуу үзлэгтээ хамрагдах боломжтой. Манай эмнэлэг өглөөний 8-11 цаг хүртэл лабораторийн шинжилгээ авч байгаа. Лабораторийн шинжилгээнд цусны ерөнхий, био хими, шээсний ерөнхий шинжилгээг авч байна. Тиймээс иргэд өлөн шээсээ авчрах гэх мэт нэн шаардлагатай анхаарах шаардлагатай зүйлс байгаа" гэв.

Нэгдүгээр төв эмнэлэгт иргэд үзлэг шинжилгээнд хамрагдахдаа хамгийн эхэлж бичиг баримтаа тулгалт хийлгэж бүртгэл хийлгэх аж. Улмаар асуумж бөглөөд цахим бүртгэлийн өрөөнд очиж ямар шинжилгээнд, аль өрөөнд орох талаар мэдээлэл авч шинжилгээндээ бүрэн хамрагдах талаар зөвлөх аж. Улсын нэгдүгээр төв эмнэлэг Сүхбаатар дүүргийн 1-6 дугаар хороо, Чингэлтэй дүүргийн 17, 19 дүгээр хорооны 18-аас дээш насны иргэдийг эрт илрүүлэг, урьдчилан сэргийлэх үзлэгт хамруулж буй.

Чингэлтэй дүүргийн 18 дугаар хорооны иргэн М.Цогзолмаа" Шинжилгээндээ хамрагдахаар хоёр дахь өдрөө ирж байна. Эхний өдрөө ерөнхий шинжилгээ,асуумж зэрэг шаардлагатай шинжилгээнүүдийг өгсөн. Миний хувьд 31 насны багцад хамрагдаж байгаа. Өнөөдөр зүрхний цахилгаан бичлэгтээ орохоор бэлдэж байна. Иргэдийн хувьд урьдчилан сэргийлэх үзлэг шинжилгээндээ бэлтгэлтэй мэдээлэлтэй ирэх тал дээр анхааруулах хэрэгтэй байх. Мэдээлэлгүй учир  шинжилгээний цаг уртсах өдөр алдах гэх мэт хүндрэлүүд тулгарч байна гэлээ.

Сүхбаатар дүүргийн 3 дугаар хороо Б. Бямбадорж" Өрхөөс үзлэгт хамрагдах урилга хоёр өдрийн өмнө ирсэн. Урилгын дагуу өнөөдөр эмнэлэг дээрээ үзлэгтээ хамрагдахаар хүлээж байна. Урьдчилан сэргийлэх үзлэгийн хувьд хавдар зарим өвчнийг эрт үе дээр нь илрүүлэх нь маш хэрэгтэй. Тиймээс бүгд тогтсон цагтаа өөрийнхөө эрүүл мэнддээ анхаарч хамрагдаарай гэж уриалж байна. Харин зарим нэг тал дээр иргэдийн харилцаанд сул тал гарч байна. Очир дараалал дайрах, төлөвлөлт өдөртөө ирэхгүй бусад иргэдийг хүлээлгэх гэм мэт ухамсар дутсан асуудал тулгарч байна" гэлээ. 

Урьдчилан сэргийлэх үзлэгт хамрагдахдаа анхаарах зүйлс:

• Хэвлийн хэт авианы шинжилгээнд шинжилгээ өгөхөөс 3 хоногийн өмнө хий үүсгэдэг хоол хүнс хэрэглэхгүй байх 

Оношилгоо хийлгэх өдрөө:

• Өлөн үедээ эсвэл хооллосноос хойш 6-8цагийн дараа шинжилгээ өгөх
• Дурангийн оношилгоо хийлгэхээсээ өмнө харуулах 
• Давсаг шээстэй байх шаардлагатай

Зүрхний цахилгаан бичлэг:

• Зүрх судасны үйл ажиллагааг идэвхжүүлэх кофе, согтууруулах ундааны зүйл хэрэглэхгүй байх
• Бичлэг хийлгэхийн өмнө тайван байх

Цусны ерөнхий шинжилгээ:

• Шинжилгээ өгөхөөс 7 хоногийн өмнө өөх тостой хоол хүнс хэрэглэхгүй байх
• Өөх тосны хэмжээ буулгах эм уухгүй байх шаардлагатай аж.