Энэ долоо хоногт байнгын хороо, намын бүлэг, чуулган хуралдахгүй. Тодруулбал, гишүүд энэ сарын 18-наас 26-ныг хүртэлх хугацаанд тойрогтоо ажиллахаар болсон. Өнгөрөгч Баасан гаригт /2022.06.17/ Үндсэн хуульд нэмэлт, өөрчлөлт оруулах эсэх асуудлаар ард иргэдийн оролцоо, ил тод байдлыг хангах ажлыг зохион байгуулах тухай” Улсын Их Хурлын тогтоолын төслийг хэлэлцэж баталсан.

Уг тогтоолын төсөлд Үндсэн хуульд нэмэлт, өөрчлөлт оруулах эсэх асуудлаар ард иргэдийн оролцоо, ил тод байдлыг хангах ажлыг улсын хэмжээнд 2022 оны зургадугаар сарын 18-ны өдрөөс 26-ны өдрийг дуустал хугацаанд зохион байгуулахаар, мөн ард иргэдийн оролцоо, ил тод байдлыг хангаж, саналыг судлах сэдвийн хүрээ, Ард иргэдийн оролцоо, ил тод байдлыг хангах ажлыг зохион байгуулах ажлын хэсгийн бүрэлдэхүүнийг тусгасан байна. 

Ард иргэдийн оролцоо, ил тод байдлыг хангаж, саналыг судлах сэдвийн хүрээг хүний эрхийн талаарх Үндсэн хуулийн хамгаалалтыг бэхжүүлэх, ард түмнийг төлөөлөх парламентын чадавх, хариуцлагыг нэмэгдүүлэх, хот, хөдөөгийн хөгжлийг дэмжих, нутгийн удирдлагын тогтолцоог сайжруулах, Монгол Улсын Төрийн сүлдийг шинэчлэх зэрэг дөрвөн бүлгийн хүрээнд 11 сэдвээр нарийвчлан тогтоосныг гишүүд дурдсан. Иймээс энэ долоо хоногт гишүүд тойрогтоо ажиллах тул УИХ-ын байнгын хороод болон чуулган хуралдахгүй. Төрийн ордонд зөвхөн ажлын хэсгүүд хуралдах юм.