Боловсрол шинжлэх ухааны сайд Л.Энх-Амгалан хууль бусаар авсан Монголын Үндэсний их сургууль /МҮИС/-ийн нэрийг буцааж авах асуудлаар  тайлбар өглөө.

Тэрбээр "МҮИС-тай холбоотой асуудлаар би шүүхэд хандсан. Шүүхийн шатанд надтай эвлэрэх санал тавьсан. Би энэ саналыг хүлээж авахгүй.

МҮИС-ийн талаас шүүх хурлыг олон удаа хойшлуулсан. Хэрвээ ирэх есдүгээр  сарын 15 гэхэд энэ асуудлыг цэгцлэхгүй зугтаад байвал олон нийтэд нээлттэй мэдээлнэ.

МҮИС гэдэг нэрийг хууль бусаар авсан сургуулийн талд шүүхийн шийдвэр гарвал "Шүүгчийн сахилгын хороо"-нд мэдүүлж, шалгуулах болно. Нэр давхардуулан ашиглаж байгаа сургуулийн талд шүүхийн шийдвэр гарахгүй байх гэдэгт итгэлтэй байна" гэсэн юм.

Эргэн сануулахад, Монголын Үндэсний их сургуулийн зүгээс Боловсрол, шинжлэх ухааны сайд Л.Энх-Амгаланг сургуулийн нэр төрд халдсан гэх шалтгаанаар өнгөрсөн оны есдүгээр сард  шүүхэд өгч, нэхэмжлэл гаргаад буй.

МҮИС-ийн удирдлага болоод багш нарын зүгээс "Боловсролын сайд Л.Энх-Амгалан наймдугаар сарын 26-ны өдөр их, дээд сургуулиудын талаар мэдээлэл хийхдээ Монголын Үндэсний их сургуулийг луйвар хийдэг гэж хэлсэн. Энэ нь эрх зүйн хувьд доромж утгатай үг хэллэг бөгөөд гүтгэсэн үйлдэл юм.

Тиймээс МҮИС хуулийн этгээдийн хувьд нэрээ хамгаалж, нэр хүндээ сэргээлгэх зорилгоор Сүхбаатар дүүргийн иргэний хэргийн шүүхэд өнөөдөр нэхэмжлэл гарган хандаж байна. Нэхэмжлэлийн шаардлагад нэгдүгээрт, БШУ-ны сайд Л.Энх-Амгаланг уучлалт хүсэх, хоёрдугаарт няцаалт хийлгэхийг шаардаж байна.

Мөн сайдын хувиар тухайн мэдээллийг тараасан хэлбэр хэрэгслээр залруулга гаргах нэхэмжлэлийн шаардлагыг холбогдуулан гаргаж байна. Луйвар хийдэг гэсэн агуулгатай мэдээллээс болж манай сургуулийн удирдлага, багш, ажилтнууд хохирч байгаа юм. Мөн түүнчлэн төгсөгчдөд халдсан мэдээлэл гэж харж байна.

Хэн нэгэн этгээд хувийн үзэл бодлоор аливаа байгууллагыг цоллож болохгүй. 1998 оноос хойш үйл ажиллагаагаа тогтмол явуулж буй МҮИС нэрийн давхцлаас хамаарч шүүх дээр маргаантай явж байгаа. Гэхдээ ямар ч хүн у, ү үсгийг ялгах чадамжтай. Энэ нэрийн маргаанаас үүдэж нийгэмд МҮИС-ийг гутаан доромжилж болохгүй. Тиймээс салбарын сайд таныг шүүхэд өгч байна" гэдгийг мэдэгдэж байв.