Уламжлал ёсоор тав дахь жилдээ “Эрдэнэт хотын өдөр”, “Анхдагч илгээлтийн эзэд”-ийн өдрөөр  анхдагч азай буурлууд, залуу үеийн төлөөлөл дүүрэн  бахархал,  халуун алга ташилт дор  баярын хурлаа хийлээ.  

Хуралд УИХ-ын гишүүн  Д.Батлут,  ИТХ-ын дарга Д.Мөнхбат, Засаг дарга С.Батжаргал, Засаг даргын орлогч А.Түвшинжаргал нар оролцож, Монгол Улсын Ерөнхийлөгчийн зарлигаар төрийн дээд одон медаль хүртсэн иргэдэд шагнал гардуулсан юм. 
Засаг дарга С.Батжаргал баярын хурлыг нээж хэлсэн үгэндээ “Эрдэнэт хотын он цагийн түүхийг хойч үедээ үеийн үед сануулж, “Анхдагч илгээлтийн эзэд”-ийн үйлс гавьяаг мөнхөд алдаршуулж байх ёстойг онцлон хэлэв. 

Мөн тэрээр, аймгийн бодлого шийдвэрт Анхдагч, илгээлтийн эзэдийг алдаршуулах, тэдний нийгмийн хамгааллын асуудалд ахиц гаргах, хөдөлмөр бүтээлийг үнэлэх, анхдагч, илгээлтийн эздийн талаарх  бодлогыг орон нутгийн зүгээс тодорхой болгох зорилгоор “Анхдагч” дэд хөтөлбөрийг 2017-2020 онд ИТХ-аар батлуулан хэрэгжүүлсэн.  Хөтөлбөрийн хэрэгжилт сайн байсан учир 2020-2024 оны үйл ажиллагааны хөтөлбөрт тусгаж, хөтөлбөрийг үргэлжлүүлэн хэрэгжүүлж байна” гэлээ. 

        Зууны манлай бүтээн байгуулалт болсон Эрдэнэт хотыг барьж байгуулах их ажил “Эрдэнэтийн овоо”-ны арын хөндийд 1973 оноос эхэлж, 1975 оны 12 дугаар сарын 11-нд Ардын Их Хурлын Тэргүүлэгчдийн зарлигаар Эрдэнэт хотыг байгуулах шийдвэр гарч байсан түүхтэй.   Улмаар 2017 оны аймгийн ИТХ-ын тогтоолоор “Эрдэнэт хотын өдөр”, 2019 онд “Анхдагч илгээлтийн эзэд”-ийн баярын өдрийг жил бүрийн 12 дугаар сарын 11-нд хамтатган тэмдэглэх болсон билээ. 

Тэртээ 1976 оноос өнөөг хүртэл 46 жилийн хугацаанд Эрдэнэт хот улс эх орны эдийн засаг, нийгмийн хөгжилд  бодит хувь нэмэр оруулсаар ирж, эрүүл мэнд, урлаг соёл, спорт, аж үйлдвэрийн томоохон хот болон хөгжин тэлж  байна.  Эрдэнэт хот анх байгуулагдахдаа 1600 өрхийн 7800 гаруй хүн амтай байсан бол өдгөө 29 мянган өрхийн 105 мянган хүн амтай болжээ. Эх орны зүг бүрээс иргэд суурьшсан, хүний хөгжлийн индекс, өрсөлдөх чадварын үзүүлэлтээрээ Монгол Улсдаа тэргүүлсэн хот болов. 

     Баярын хурлаар Эрдэнэт хотын хүндэт иргэнээр К.Даулетбай, Д.Хасбаатар нарыг алдаршуулж,  соёл гэгээрлийн салбарт амьдралынхаа 40 гаруй жилийг зориулсан  Г.Төмөрхаанд Монгол Улсын Ерөнхийлөгчийн зарлигаар “МОНГОЛ УЛСЫН СОЁЛЫН ГАВЬЯАТ ЗҮТГЭЛТЭН” цол хүртээлээ.   Энэ мэтчилэн аймаг, орон нутаг улс эх орныхоо хөгжилд хувь нэмрээ оруулсан иргэдийн хөдөлмөрийг үнэлсэн төрийн дээд  шагнал, аймаг орон нутгийн нэрэмжит шагналын буухиа “Эрдэнэт хоты өдөр”, “Анхдагч илгээлтийн эзэд”-ийн өдрөөр үргэлжиллээ.