“За ноосоо тушаачихлаа, намынхаа батлахыг өгчихлөө, эхнэр салаад явчихлаа, ажил ч эмхэрч байна даа” гэсэн нэг шог үг байдагсан.

Түүнлүгээ цагаан сараа тэмдэглэчихлээ, эмэгтэйчүүдийнхээ эрхийг хамгаалах өдрөө баяр болгоод тэмдэглэчихлээ. Одоо залгаад Монголд орчин үеийн зэвсэгт хүчин байгуулагдсан өдрийг “эрчүүдийн баяр” болгоод хавтгайруулан тэмдэглэнэ. Ер нь бол баяр ёслол, наргиж наадах ажил ч ёстой ар араасаа цувж байна даа. 

Хаврын урь хэдийнээ орж хүмүүсийн алхаа удаашран налайх маягтай болж эхэллээ. Ийн цаг улирлаа даган, хэн хүнгүй налайж эхлэхийн зуур УИХ гэдэг хулгайч дээрэмчдийн бүлэг хаврын чуулганаа нээж хуралдана. Хуралдана ч гэж дээ, хамаг гишүүд нь энэ олон баярыг далимдуулан хөдөө орон нутагт ажиллаж байгаа нэрийн дор ууц таллан, бууж жигнүүлэн дайлуулж, олон таван юм ч ярилгүй шууд л одон гардуулаад явж байгаа. Одоо цэргийн, эрчүүдийн баяр нэрийн дор бас хэдэн хүнд одон гардуулчих санаатай тэр чуулгандаа ирэхгүй нь тодорхой. 

Хаврын чуулганы нээлтэд ирлээ гэхэд маргааш нь, зарим нь бүр тэр өдөртөө  буцаад хөдөөг зорьж цэргийн анги салбарууд, ахмад, бэлтгэл дайчдад одон медаль тараана. Ард түмний татварын мөнгөөр гар утасны төлбөр, бензин шатахууны бүхий л зардлаа даалгадаг, өөрсдийн нь хүч хөдөлмөр шингээгүй болохоор энэ хүмүүст хайрлаж харамлах, хэмнэх ойлголт огт байхгүй. 

Намрын чуулган тараад л  баахан бэлэг сэлт, одон медаль аваад сүүлэндээ гал тавиулсан мэт алга болсон энэ хэдэн нөхөр хаврын чуулганаар хэлэлцэх хуулийн төслийг ажлын хэсгүүд, байнгын хороод  ярилцаж хэлэлцсэн нь бараг үгүй. Өдөр ирэх бүрийд бараа бүтээгдхүүний үнэ өсөн нэмэгдэж, энэ хүмүүсийг сонгосон ард түмний нь амьдрал улам хүндэрсээр байгаа нь эдэнд огтоос хамаагүй. 

Тэртээ зургаан жилийн өмнө энэ намын нэг зүтгэлтэн Ж.Мөнхбат “нэг ам.доллар 17 боодол нэгтийн дэвсгэрттэй тэнцэж байна шүү дээ” гээд уулга алдаж, бид л  засгийн эрхэнд гараад ирвэл бараг л ам.доллар, төгрөгийн харьцааг 1:1 болгох тухай ярьж байсан атал энэ намыг зургаан жил төрийн эрх барьсан хугацаанд  нэг ам.доллар 3500 төгрөг буюу 35 боодол нэгтийн дэвсгэрттэй тэнцдэг болчхоод байхад эрх баригчид энд тэнд хийж байгаа хурал зөвлөгөөн дээрээ амьдрал сайхан, улс орон хөгжин цэцэглэж, эдийн засгийн өсөлтөөрөө дэлхийд бараг л тэргүүлж байгаа мэт сайхан ярьцгаан хүний толгой эргүүлнэ. Ийм ч болохоороо УИХ-ын гишүүд урьд өмнө нь  улс орны байдал, баталсан хууль тогтоомж энэ тэрээ ярьж, ард иргэдийн асуултад хариулдаг байсан бол өнөөдөр аргаа өөрчлөөд шууд л одон гардуулдаг болж. Яриад эхэлбэл өнөөх сонгуулийн амлалтаас нь биелсэн зүйл огт байхгүй, бүгд урвуугаар эргэчихсэн болохоор тэр. Ярьдаг юм нь нефтийн үйлдвэр барьж байгаа, нүүрсний хулгайчдыг мөрдөн шалгаж эхэлсэн гэх мэт, үүнээс нэг их хэтрэхгүй, Хэтрээд яриа сунжирвал  шүүмжлэлийн  туйлаадаст нэрвэгдэнэ.  Хэрэглээний бараа бүтээгдхүүний үнэ, инфляци энэ тэрийн тухай асуулт гарвал коронавирусын цар тахлаас болсон гээд гүйцээ. 

Умард Солонгосын удирдагч Ким Чен Ун хөдөө тосгоныг хөгжүүлье гэсэн уриа дэвшүүлсэн шиг манайхан нийслэл хотоо хөгжүүлчихлээ, одоо “хөдөөг сэргээе” хэмээсэн том хурал хийлээ. УИХ-ын дарга Г.Занданшатар “Зөвлөлдөх уулзалт” нэртэй хэсэг жүжиг тоглов. Эндэх төлөөлөгчдөө “түүврийн аргаар сонгож авсан” гэж байгаа. Хэний төлөө дуугарч, хэнд үйлчлэх нь эндээс тов тодорхой. 

Одоо МАН-ынхан Монгол Улсын Үндсэн хуульд нэмэлт өөрчлөлт оруулах, магадгүй бүр шинэ Үндсэн хууль зохиогоод УИХ-д оруулан хэлэлцэхээс ч  сийхгүй. Энэ намд эргэж ирсэн Н.Энхбаяр нэг ийм төсөл барьчихаад л энд тэндгүй яриад яваа. Чухам үүнд л энэ зөвлөлдөх уулзалт гэдгээ  ёстой нөгөө “нохойд барьдаг мод” гэдэг шиг өмнөө барина. Ард иргэд үгүй яагаад Үндсэн хуульд ийм өөрчлөлт оруулах гээд байна аа гээд эхлэхэд “та нарын төлөөлөл болсон зөвлөлдөх уулзалтаас ийм санал гаргасан юм аа. Нэгэнт тэд та нарыг төлөөлж байгаа болохоор та нарын саналыг тусгасан гэсэн үг” гээд өөрсдөө туршлагатай парламентч нэрээр УИХ-д бүх насаараа суух, гишүүдийн тоог зуу давуулан олон болгож хамаатан садан, эхнэр хүүхдээ оруулах бүх зүйлээ хийнэ. 

Та биднийг баяраас баяр дамжин найрлан наргиж, ирж байгаа цагийн сайхныг гайхан назгайрч байхын зуур эрх баригчид юу л хийгээд байгаа бол доо. 

Эх сурвалж: Монголын мэдээ сонин
2023 оны гуравдугаар сарын 13. Даваа. №039 (5767)