“Төмөр замын тээврийн тухай хууль”-ийн шинэчилсэн найруулгыг УИХ-ын хаврын чуулганаар хэлэлцүүлж батлан, 2024 оны 01 дүгээр сарын 01-ээс мөрдөж эхлэхээр тогтсон. Үүний хүрээнд хуулийн шинэчилсэн найруулгыг төр болон төмөр замын тээвэрт оролцогч байгууллага, аж ахуйн нэгж, этгээдүүд, төмөр замын тээврийн салбарын нийт албан хаагч болон олон нийтэд нээлттэй сурталчлан таниулах “Төмөр замын тээврийн тухай хууль шинэчилсэн найруулга сурталчлан таниулах арга хэмжээ” өнөөдөр /2023.09.28/ зохион байгуулагдлаа.

Тус үйл ажиллагаанд төмөр замын тээврийн чиглэлээр үйл ажиллагаа эрхэлдэг байгууллагуудын төлөөлөл 150 гаруй төмөр замчид оролцлоо.

Арга хэмжээний хүрээнд “Төмөр замын тээврийн тухай хууль” /шинэчилсэн найруулга/-ийн танилцуулга, хуулийн шинэчилсэн найруулгын хууль зүйн ач холбогдол, онцлох зохицуулалт зэрэг сэдвийн хүрээнд өрнөсөн хэлэлцүүлэгт “Монголын төмөр зам” ТӨХК-ийн Эдийн засаг, хөрөнгө оруулалтын газрын дарга Д.Банзрагч оролцлоо.

Тэрбээр “Төмөр замын тээврийн тухай хууль”-тай уялдуулж “Монголын төмөр зам” ТӨХК-ийн 2024-2050 он хүртэлх дунд, урт хугацааны стратеги төлөвлөгөөг боловсруулж байна.

Хууль хэрэгжиж эхэлснээр зах зээлийн өрсөлдөөнийг бий болгох, төмөр замын тээврийн болон суурь бүтцийн үйлчилгээ үзүүлэгчдийн тэгш оролцоог хангах нөхцөл бүрдүүлснээр үйлчилгээ сайжирч тэр хэмжээгээр тээврийн үр ашгийг нэмэгдүүлнэ гэж харж байна. Үүнийг дагаад хөдлөх бүрэлдэхүүний засвар үйлчилгээ, сэлбэг хэрэгсэл, үйлдвэрлэл гэх мэт импортыг орлох бүтээгдэхүүнийг бид дотооддоо хийх нөхцөл бүрдэж байна. Мөн Төрийн захиргааны төв байгууллагын дэргэд тарифыг оновчтой болгох зорилгоор орон тооны бус зөвлөл байгуулахаар хуульчлан зааж өгсөн нь онцлог юм.

Манай компанийн хувьд Монгол Улсын хэмжээнд Төрөөс төмөр замын тээврийн талаар баримтлах бодлогыг хэрэгжүүлж байна. Гадаад болон дотоодын хөрөнгө оруулагч нартай хамтран томоохон төсөл хөтөлбөрүүдийг хэрэгжүүлээд явж байна. Шинээр батлагдсан хуульд Монгол Улсын нутаг дэвсгэр дээр байгуулах төмөр замын суурь бүтцийн зураг төслийг гадаадын хуулийн этгээд боловсруулах тохиолдолд Монгол Улсын тусгай зөвшөөрөл бүхий хуулийн этгээдтэй хамтран гүйцэтгэнэ гэж заасан. Мөн зураг төсөл боловсруулах ажлын төсөвт өртгийн 0.4 хувиар тооцсон орлого бүрдүүлж стандартын санд бүрдүүлэх зэрэг асуудлууд тусгагдсан байгаа…” хэмээн онцлов.