АНУ-ын Ерөнхийлөгчийн сонгуульд Бүгд найрамдах намаас нэр дэвшигч Доналд Трампын эмэгтэйчүүдийг зүй бус үгээр гутаан доромжилж буй бичлэг цацагдсанаас хойшхи анхны олон нийтийн санал асуулгын дүн гарлаа. Үүнээс үзэхэд, Хиллари Клинтон түүнээс 11 хувийн илүү дэмжлэгтэйгээр нэр дэвшигчдийг хошуучилж эхэлсэн байна.

NBC News, Wall Street Journal сэтгүүлийн хамтарсан санал асуулгаар жижиг улс төрийн хүчнүүд болох Либериал, Ногоон намын нэр дэвшигчдийг оролцуулж тооцвол Хиллариг дэмжигчдийн хувь 46 байсан бол Трампынх 35 хувь байжээ. Харин жижиг хүчний нэр дэвшигчдийг хасч тооцвол Төрийн нарийн бичгийн дарга асанг дэмжигчдийн хувьд аль хэдийнэ 52 хувьд хүрчээ. Харин эсрэгээр тэрбумтан эрийг судалгаанд оролцогсдын 38 хувь нь дэмжсэн байна.

Дуулиан шуугиан тарьсан 2005 оны тэрхүү бичлэгт Доналд Трамп ичгүүр сонжуургүйгээр эмэгтэй хүнийг гутааж, нэр алдартай байсан цагт тэднээр юу хүссэнээ хийлгүүлж болно гэх зүй бус үгийг хэлсэн байдаг.

Энэ судалгааг бичлэг тарсны дараа, хоёр дахь халз мэтгэлцээний өмнө явуулжээ. Ингэхэд судалгаанд оролцогсдын 52 хувь нь Трампыг сонгуулийн өрсөлдөөнөөс буцаан татах хэрэгтэй гэж үзсэн бол 42 хувь нь шаардлагагүй гэж хариулсан аж.