Энэ долоо хоногийн хувьд монголчуудын уламжлалт баяр цагаан сарын баярын өдрүүд болон бэлтгэл ажлын  өдрүүд үргэлжилнэ. Зөвхөн цагаан сараар төдийгүй баярын сургаар түгжирцгээдэг нь жинхэнэ уламжлалт ёс билээ. Өчигдөр өглөөний байдлаар харахад тэр уламжлал хль хэдийн эхэлсэн нь тодорхой байна билээ.

Хотын бидний хувьд утаа униар, замын түгжрэл, хэрүүл шуугиан гээд бөөн стресс дунд амьдарсаар. Хэдийгээр дугаарын хязгаарлалт үйлчилж байгаа ч хот тэг зогссоор л байна. Аргагүй шүү дээ, дарга даамал, баячууд нь хоёр машин хоёр дугаартай, харин ганц машинаар борог амьдралаа залгуулдаг эгэл иргэд нь хүүхдээ сургуульд хүргэж, дэлгүүр хоршоо орох гэж зам дээр хэдэн цагаар зогсоцгооно.

Дээр нь замын уулзварууд дээр зогсоэж байгаа зохиуцуулагч нар нь нэгдүгээрт, аль чиглэлийн зам чөлөөтэй буйг тооцоололгүй, өөрийн орчинд зохицуулаад байдаг учраас нэвтрүүлсэн машинууд дөнгөж уулзварын цаана гараад мөн түгжирдэг. Хоёрдугаарт, дарга нар,  баячууд, түүний  авгай хүүхдийг явуулахын тулд нэг урсгалыг өчнөөн удаан хаадаг гэж иргэд уурсдаг. Жолооч нарын тэвчээргүй, амиа бодсон, дүрмээ баримталдаггүй, бусдыг үл хүндэтгэсэн байдлаас болоод замын хөдөлгөөнд ихээхэн саад учруулдаг, мөн зохиомол түгжрэл  үүсгэдэг. Мөн жолоо барьж буй хүмүүс гарц, гарам дээр утсаа оролдоод суучихдаг зэрэг нь нийслэл хотын тэг зогсолтод ихээхэн нөлөөлдөг.

Бас нэг шалтгаан нь цагаан сарын хямдралтай худалдаа зарлаж буй автозам дагуу байрлаж буй томоохон дэлгүүр, хоршоо,  худалдааны төвүүд юм, тэд гаднаа автомашины зогсоол байдаггүй. Өчигдөр амралтын өдөр гэлээ ч  битүү түгжрэл, энэ янзаараа энэ хэдэн өдөр машин явахгүй нь тодорхой. Тиймээс бүгдээрээ энэ мэтээ тооцсон нь дээр байх.

Нийслэл хотод амьдарч буй 1.5 сая гаруй иргэний 939.1 мянган иргэн буюу 61 хувийг 20-оос дээш насныхан эзэлж байгаа гэх. Тэгэхээр үүнийг хасаад тооцоод үзэхэд  20-оос дээш насны гурван иргэн тутмын хоёр нь автомашинтай болж байна. Уг нь нийтийн тээврээ шийдэж, нэгдүгээр эгнээгээ чөлөөлчихвөл түгжрэл бууна гэж хэлдэг. Даанч  нийтийн тээвэр нь хүрэлцээ хангамж, үйлчилгээ гээд бүгд найдваргүй. Тэгэхээр түгжрээд ч болов өөрийн машинтайгаа зорчих иргэдийг буруутгах аргагүй.   2017 онд манай улс 260.3 мянган ам.долларын үнэлгээ бүхий 48871 суудлын, 191.2 мянган ам.долларын 14155 ачааны машин импортолж байж. Тэгвэл 2020 оны эхний долоон  сарын байдлаар 32438 суудлын, 11.5 мянган ачааны машин импортолж. Үндсэндээ 44 мянган машин оруулаад ирчихсэн байна.

Иргэд нь тав, зургаан цаг зам дээрээ гацан, уур бухимдлаа барж, машиндаа амьдрах шахаж байхад,  сайд, дарга нар нь түгжрэл үүсгээд, ногоон гэрлээр өөрсдийгөө татуулж, ямбалдаг гэдгийг амтай бүхэн ярьсаар. Баярын өмнөх энэ хэдэн өдөр томчууд минь ямба эдлэхгүй, бидэнтэйгээ зэрэгцээд явна гэж байхгүй л байх даа.

Эх сурвалж: Монголын мэдээ сонин

2024 оны хоёрдугаар сарын 05. Даваа. №012 (5930)