Өнгөрсөн долоо хоногт дэлхий дахинаа болсон онцлох үйл явдлыг тоймлон хүргэж байна. 

 

Тайландын эзэн хаан таалал төгсөв

 

Дэлхийн хамгийн урт хугацаанд хаан ширээнд заларсан язгууртанд өргөмжлөгдөж байсан Тайландын эв нэгдлийн бэлгэдэл болсон эзэн хаан Пумипон Адульядет 88 насандаа өвчний учир тэнгэрт халилаа.  Тэрээр сүүлийн нэг жил орчим хугацаанд эмнэлэгт хэвтсэн бөгөөд өнгөрөгч зургадугаар сард зүрхний мэс засалд орсон юм.

 

Гэсэн ч биеийн байдал нь дээрдэлгүй улам муудсаар энэ сарын 13-ны өдөр таалал төгсчээ. Эзэн хаан таалал төгссөн мэдээлэл гарсны дараа ард иргэд нь түүний зургийг барин залбирч, уй гашуу болов.  Эзэн хаан Пумипон Адульядет бол ядууралтай тэмцэх, хөдөө орон  нутгийг хөгжүүлэхэд ихээхэн хувь нэмэр оруулсан хүн билээ. 

 

Мөн тэрээр улс төрийн хямрал дэгдсэн хүнд үед улс орноо нэгтгэхэд чухал үүрэг гүйцэтгэж байсан юм. Тайландын нийслэл Бангкок хотод эзэн хааны шарилыг ачсан машины цуваа эмнэлгээс хааны ордныг чиглэн хөдлөх үед  гудамж талбайд  хэдэн зуун гашуудлын хувцастай хүмүүс цугларч, “Ард түмний хаан” хэмээн  орь дуу тавин уйлж байжээ.

 

Тэд эзэн хаанаа эцсийн замд нь ийнхүү үдэж, цэргийн алба хаагчид нь ёслон хүндэтгэл үзүүлж байсан аж.  Улмаар энэ сарын 30-ны өдрийг хүртэл улс орон даяар гашуудал зарлав.  Энэ хүрээнд архи согтууруулах ундаа худалдан борлуулахыг хоригложээ.  

 

Португалийн Ерөнхий сайд асан НҮБ-ыг тэргүүлнэ

 

Өнгөрсөн долоо хоногт өрнөсөн онцлох үйл явдлын нэг нь НҮБ-ын дараагийн тэргүүн тодорсон үйл явдал байв.  Нью-Йорк хотод хуран цугларсан НҮБ-ын 71 дүгээр чуулганы төлөөлөгчид энэ сарын 13-ны өдрийн хуралдааны үеэр  Бан Ги Мүний залгамжлагчийг тодруулахаар санал хурааж, улмаар  дараагийн  Ерөнхий нарийн бичгийн даргаар Португалийн Ерөнхий сайдаар ажиллаж байсан Антонио Гутереш сонгогдов.  Тэрбээр үүрэгт ажилдаа 2017 оны нэгдүгээр сарын 1-нээс орох бөгөөд бүрэн эрхийн хугацаа нь таван  жил юм. Антонио Гутериш 2015 оныг хүртэл НҮБ-ын Дүрвэгчдийн асуудал эрхэлсэн дээд комиссараар ажиллаж байжээ.

 

Бан Ги Мүнийг залгамжлах дараагийн удирдагч нь эмэгтэй хүн, түүнчлэн  зүүн Европоос гаралтай байх талаар олон таамаг гарч байв. Гэвч  Антонио Гутереш  13 нэр дэвшигчтэй өрсөлдөн сонгогдсон юм.  Хамгийн гол нь Аюулгүйн зөвлөлийн гишүүн орнууд Гутерешийг санал нэгтэй дэмжсэн нь ийнхүү түүний өмнө НҮБ-ын ерөнхий нарийн бичгийн даргын суудалд томилогдох замыг зассан билээ. Ямартай ч, түүнийг 10 жил НҮБ-ыг тэргүүлсэн Бан Ги Мүнээс ч илүү том үүрэг хариуцлага хүлээж байгааг эх сурвалжууд онцолж байна. 

 

Трамп Хилларид хар тамхины шинжилгээ хийлгэхийг хүсэв

 

АНУ-ын Ерөнхийлөгчийн сонгууль ирэх сарын 8-нд болно. Сонгуулийн хугацаа тулсан энэ үед  нэр дэвшигчдийн өрсөлдөөн улам ширүүсч байна. Энэ сонгуульд Бүгд Найрамдах намаас үл хөдлөх хөрөнгийн тэрбумтан Доналд Трамп, Ардчилсан намаас Төрийн нарийн бичгийн дарга асан Хиллари Клинтон нар өрсөлдөж буй билээ.  Тэдний хамгийн сүүлчийн буюу гурав дахь удаагийн халз мэтгэлцээн орон нутгийн цагаар лхагва гарагт болох юм. 

 

Тэгвэл Доналд Трамп хамгийн сүүлчийн халз мэтгэлцээнээс өмнө Хиллари Клинтоныг хар тамхины шилжилгээнд хамруулах ёстой гэж мэдэгдсэн нь дуулиан тарилаа. Тэрбээр Нью Хэмпшир мужийн Портсмут хотод болсон уулзалтын үеэр “Клинтонд юу тохиолдсоныг нь сайн мэдэхгүй юм. Өнгөрсөн удаагийн халз мэтгэлцээний эхэнд тэр их л зориг орсон мэт харагдаж байсан. Гэхдээ эцэстээ  хачин болчихсон.

 

Тамирчдад сэргээшийн шинжилгээ хийдэг шүү дээ. Яг түүн  шиг АНУ-ын сонгуульд нэр дэвшигчдэд ч гэсэн халз мэтгэлцээнд орохын өмнө хар тамхины шинжилгээ хийх шаардлагатай гэж бодож байна” гэж ярьжээ. 

 

ОХУ-ын “Адмирал Кузницов” газар дундын тэнгисийг зорилоо

 

ОХУ-ын онгоц тээвэрлэгч “Адмирал Кузницов” Сирийн босогчдын эсрэг агаараас дэмжлэг үзүүлж буй тус улсын тэнгисийн цэргийн хүчнийхний байрлаж буй газар дундын тэнгис дэх баазыг чиглэн хөдөлжээ.  Энэ талаар тус улсын Батлан хамгаалах яамнаас мэдээлсэн байна.  Энэ явдлаас хэдэн долоо хоногийн өмнө ОХУ-ын Батлан хамгаалахын сайд Сергей Шойгу онгоц тээгчийг газар дундын тэнгис рүү илгээж, ОХУ-ын тэнгисийн цэргийнхний хүчийг нэмэгдүүлнэ гэдгээ мэдэгдээд байсан юм. 

 

Гэсэн ч, хэзээ хөдлөх нь тодорхойгүй байсан билээ.  Ямартай ч, өнгөрөгч долоо хоногийн сүүлчээр хөлөг  Оросыг орхисон бөгөөд онгоц тээгчид “Pyotr Veliky”, Vice Admiral Kulakov хөлөг онгоцноос гадна, шумбагч онгоц эсэргүүцэгчийг ачсан ажээ. ОХУ Сирийн Ерөнхийлөгч Башар Ал Ассадын цэргийн хүчийг дэмжиж, Сирийн босогчдын эсрэг цохилт өгч эхэлснээс хойш нэг жилийн хугацааг үдэж буй.

 

Гэсэн ч сүүлийн үед мөн л дэмжлэг үзүүлэх зорилгоор тэнгисийн цэргийн хүчээ зузаатгах болсон юм.  ОХУ-ын Батлан хамгаалах яам тус улсад цор ганц байдаг “Адмирал Кузницов” онгоц тээгчийг засварласнаас хойш анх удаагаа дайны бүс рүү илгээж буй нь энэ билээ. “Адмирал Кузницов”  нь барууны стандартаар бол онгоц тээвэрлэгч хөлөгт багтах хэдий ч АНУ-ын “Nimitz” төрлийн онгоц тээвэрлэгчээс өөр зориулалтаар бүтээгдсэн байна.

 

Учир нь “Nimitz” нь зөвхөн ойрын зайны зэвсэглэлтэй байдаг бол “Кузнецов” нь онгоц тээвэрлэгч хүнд крейсер юм. Тиймээс ч зэвсэглэлийн хувьд илүү бөгөөд харин онгоц болон нисдэг тэргийг  тээвэрлэх хэмжээ нь бага юм байна.