Өнөөдөр Их Эзэн Чингис хааны өдөр буюу Их Эзэн Чингис хаан мэндэлсэн билгийн тооллын өвлийн тэргүүн сарын шинийн нэгэн. Эзэн Богд Чингис хаан мэндэлсний 862 жилийн ой, Монгол бахархлын өдөр тохиож байна.

Монгол бахархлын өдөр нь Монгол Улсад 2012 оноос бүх нийтийн амралтын өдөр болгон тэмдэглэн өнгөрүүлж буй баярын өдөр юм. Монгол Улсын Ерөнхийлөгчийн 2012 оны 1 сарын 9-ний өдрийн 4 тоот зарлигаар эзэн богд Чингис хааны мэндэлсэн огноог холбогдох ажлын хэсгийн дүгнэлт болон ШУА-ны саналд үндэслэн албан ёсны болгож, билгийн тооллын өвлийн тэргүүн сарын шинийн нэгэн гэж тогтоон, уг өдрийг "Монгол бахархлын өдөр" болгон тэмдэглэн өнгөрүүлж байхаар болсон.

Мөн “Чингис хаан” одонд нэр дэвшүүлэх, шагнах журам”-д “Улс түмний эв нэгдэл, хөгжил цэцэглэлт, хүн төрөлхтөний амар амгалан байдлыг бэхжүүлэх болон Монгол Улс гадаад орнуудтай тогтоосон харилцаа, хамтын ажиллагааг хөгжүүлэх, дэлхий дахинд Монгол Улсын нэр хүндийг өргөн сурталчлах, тус улсын эдийн засаг, нийгэм, оюун санааны хөгжилд бодитой хувь нэмэр оруулсан гадаад орны төр, нийгмийн зүтгэлтэн, иргэн”-ийг шагнаж болохоор заасан юм.

Энэ жилийн хувьд гадаадын хоёр дахь иргэн энэхүү эрхэм шагналыг хүртэнэ. Тодруулбал, БНСУ-ын иргэн, НҮБ-ын найм дахь Ерөнхий нарийн бичгийн дарга Бан Ги Мүн-д Монгол түмний бахархал болсон эрхэм хүндэтгэлийг хүртээнэ.

Энэ өдөр Монгол Улсын Төрийн далбааг мандуулж, Есөн хөлт цагаан тугаа цэнгүүлэн, Их Эзэн Чингис хааны алтан сургаал айлдвараас сонордуулж, “Чингис хаан” цомын төлөө улс, аймгийн алдар цолтой хүчит 128 бөх хүчийг үзнэ. Мөн Монголын Улсын түүх судлалыг дэмжих тухай Ерөнхийлөгчийн зарлигт гарын үсэг зурах, гардуулах арга хэмжээ болно.

Монгол түмэн өнөөдрийг омогшил, бахархалаар дүүрэн байж, тэнүүн жаргалтайгаар тэмдэглэн өнгөрүүлнэ.

Эрхэм уншигч та бүхэнд Эзэн Богд Чингис хаан мэндэлсний 862 жилийн ой, Монгол бахархлын өдрийн эрхэм мэндийг дэвшүүлэн өргье.