Архангай аймгийн Эрдэнэбулган сумын Иргэдийн Төлөөлөгчдийн Хурлын дарга, төлөөлөгчид, ажлын албаны хамт олон өнөөдөр Баянгол дүүрэгт зочиллоо.

Зочдыг дүүргийн Иргэдийн Төлөөлөгчдийн Хурлын дарга П.Өлзийнаран, Баянгол дүүргийн ИТХ дах МАН-ын бүлгийн дарга Г.Мөнхсайхан, Хурлын нарийн бичгийн дарга бөгөөд Ажлын албаны дарга С.Уранмандах болон албаны бусад хүмүүс хүлээн авлаа.

Уулзалтын эхэнд ИТХ-ын дарга П.Өлзийнаран: Нутгийн өөрөө удирдах байгууллагын орон нутаг дахь төлөөллүүд Баянгол дүүргийн сонгон зочлон нутгийн захиргааны байгууллагуудын үйл ажиллагаатай танилцаж туршлага судлах, харилцан санал солилцохоор хүрэлцэн ирсэнд баяртай байна.

Өнөөдрийн уулзалтаар нутгийн захиргааны байгууллагууд бодлогын түвшинд мэдээлэл солилцох, албан хаагчид харилцан туршлага судлах нь ИТХ-ын байгууллагуудын үйл ажиллагааг төгөлдөржүүлэхэд түлхэц үзүүлээд зогсохгүй орон нутгийн онцлогт тохирсон олон талт арга хэмжээгээр цаашид хамтран ажиллана гэж үзэж байна. Та бүхэнд ажлын өндөр амжилт хүсье” гэлээ.

Архангай аймгийн Эрдэнэбулган сумын ИТХ-ын дарга Л.Мөнх-Эрдэнэ: “Бидний хүсэлтийг хүлээн авсан Баянгол дүүргийнхээ та бүхэн баярлалаа. Өнөөдрийн уулзалт арга хэмжээгээр бид бие биенээсээ сайн туршлагыг харилцан суралцах боломжийг бүрдүүлж, Баянгол дүүрэгт хийж хэрэгжүүлж буй сайн туршлагыг нутаг орондоо нутагшуулах боломж бүрдэж байна” гэж тодотголоо.