Хэн нэгний хувийн амьдралыг гуйвуулан бичиж хандалтаа өсгөх гэсэн шар сайтууд болон фэйсбүүк, твиттер хуудаснаа од болох гэсэн хүсэлтэй хүмүүсийн тэнэглэл хэрээс хэтэрлээ. Хошуугаа унжуулсан зураг, хэнд ч хэрэггүй афоризм бичигчдийн лайк авч, дагагчдынхаа тоог нэмэх гэсэн тэнэглэл нь сүүлдээ гудамжинд хүүхдээ сугавчлаад зогсож буй гэм, зэмгүй өндөр настны нэр төрд халдахад хүрэв. Хэрэг явдлыг эргэн сануулахад, энэ сарын 1-нд “Хүүхдээ шил архиар зарна” хэмээх гарчигтай мэдээлэл хүүхдээ зүүн гартаа сугавчилсан эрэгтэйн зурагны хамт цахим ертөнцөөр нэг тарсан. Уг мэдээллийг фэйсбүүкт байршсан даруйд зурган дээрх утас руу олон хүн залгаж хүүхдээ зарах эсэх талаар асуусан байна.

Үүний дараа хүүхдийн ээж аавынх нь зураг сошиал хуудсанд тарсныг мэдэн Цагдаагийн байгууллагад хандаж, улмаар хэвлэлийн бага хурал зарласан билээ. Хэвлэлийн бага хурлын үеэр хүүхдийн ээж “Манай аав архи уудаггүй. Тухайн үед надад туслаад хүүхдийг маань харж өгч байсан” хэмээсэн юм. Энэ үеэр цагдаагийн байгууллагаас ч уг зургийг хэд хэдэн сайтууд авч мэдээ бэлтгэсэн тухай ч мэдээлж байлаа. Хэн нэгний зургийг зөвшөөрөлгүй авч, элдэв нэр өгөн фэйсбүүк, твиттер хуудаснаа тавьсан тохиолдол анх удаа давтаг­даж байгаа юм биш.

Өмнө ч гэсэн ийм тохиолдол мэр сэр гардаг байсныг хэн ч үгүйсгэхгүй биз. Харин энэ удаад байдал хэрээс хэтэрч, шар сайтууд хүртэл фэйсбүүк хуудаст байршсан үнэн худал нь мэдэгдэхгүй нэг зургийг авч, хүний нэр төрийг гутаан доромжлоод зогсохгүй хүүхдийн эрхэнд хүртэл халдаж орхив. Үндсэн хуульдаа хүртэл хүний эрх, эрх чөлөөний тухай заасан юм чинь ниргэсэн хойно нь хашгираад яах вэ. Ийм төрлийн гэмт хэрэг дахин давтагдахгүй гэх баталгаа алга. Шар сайт, сошиал ертөнцөд галзуурагчид байсаар байгаа цагт зогсоно гэдэг юу л бол. Нөгөөтэйгүүр манай улсад ийм төрлийн гэмт хэрэгт тавьж байгаа хяналт учир дутагдалтай байгаа юм. Өөрийн цахим хуудастаа хүн бүр үзэл бодлоо бичих эрхтэй.

Гэхдээ хүний нэр төрд халдаж болохгүй. Энэ тухай Монгол Улсын Эрүүгийн хуулийн 111, 113 дугаар заалтад хүртэл нарийн тусгасан. Гэвч цахим ертөнцөд энэ хууль бүрэн хэмжээнд хэрэгжинэ гэдэг асуудалтай. Өдөрт олон мянган хүн фэйсбүүк, твиттер хуудаснаа хандаж байгаа нөхцөлд хэн, хаана юу бичиж байг цагдаагийн хэдхэн ажилчид хэрхэн хянаж байгаа нь ч ойлгомжтой. Тиймээс шар сайт болон фэйсбүүк, твиттер хуудаснаа хүний нэр төрд халдагчдад тавих хяналтаа сайжруулъя. Бүр шийтгэдэг ч байсан яадаг юм.

Яах вэ, хэрвээ шар сайтууд хүний нэр төрд халдсан бол тухайн хүнээс албан ёсоор уулчлал гуйн, сэтгэл санааны хохирлыг барагдуулдаг байж болно шүү дээ. Өнөөдөр “хүүхдээ ганц шил архиар зарна” гэж мэдээлсэн шар сайтууд хохирогчдоос албан ёсоор уучлал гуйсан бил үү. Сайтын ганц буланд ч болтугай уучлалт гуйсан мэдээлэл хийсэн үү. Хүүхдийн зургийг анх твиттерт тавьсан гэх этгээдийг олсон гэж мэдээлсэн ч хэн гэдгийг одоо болтол олон нийтэд зарлаагүй л байна. Гэм зэмгүй нэгэн нь олны доог тохуу болж хоцроод хэрэгтэн нь сэтгэл амар үлдэж байх. Эндээс иргэд “Өө болдог юм байна.

Хүнийг олон нийтийн сүлжээгээр доромжлоход яадаг ч үгүй юм байна” гэдэг ойлголтыг л авч байна. Цахим ертөнц, шар сайтууд дахь хяналтаа сайжруулахгүй бол хүний нэр төрд халддаг, гутаан доромжилдог явдал хэрээс хэтэрлээ. Өнгөрсөн жил гэхэд арван жилийн охид зодолдож буй бичлэг фэйсбүүк хуудаснаа тарж, бичлэг дээрх охид болоод тэдний ээж, аавыг нь хүртэл газар дор ортол муулж л байсан. Хэн ч тэр охид болон аав, ээж нарт нь яаж нөлөөлөх талаар санаа зовоогүй. Хууль хяналтын байгууллагаас ч тэр бичлэгийг хэн анх оруулсанг нягталж шалгаагүй. Хэрэг үүгээр ч дуусахгүй. Тиймээс сошиал ертөнцөд хэт даврагчид болон хэн нэгний өчүүхэн алдааг ч өлгөн авч сүр бадруулж олон нийтэд мэдээлдэг шар сайтуудаа нэг шалгавал ямар вэ. Тэгэхгүй бол эд мөд толгой дээр чинь гарч суух нь байна шүү.