Туркийн Ерөнхийлөгч Ресеп Тайип Эрдоган Израилын телевизийн нэвтрүүлэгт ярилцлага өгчээ. Улмаар нэвтрүүлгийн хөтлөгч түүнээс “Нацист Германы Адольф Гитлер болон Израилын аль нь хамгийн харгис вэ” гэх асуултыг асуусан байна. Гэтэл хариуд нь Эрдоган “Бараг адилхан” гэж хэлсэнээр хоёр улсын харилцаа дахин хурцдаж болзошгүй байдалд хүрчээ.

Р.Эрдоган “Гитлерийн хийсэн зүйлийг хүлээн зөвшөөрөх аргагүй.  Израилын ч гэсэн өнөөг хүртэлх бусармаг үйлдлийг  хүлээн зөвшөөрөх боломжгүй.  Маш олон хүн амиа алдсан учраас аль нь илүү харгис вэ гэж асуух нь тохиромжгүй гэж бодож байна” хэмээн өөрийн үзэл бодлоо илэрхийлжээ. Турк, Израил хоёр улсын харилцаа 2010 онд  хурцдаж байсан удаатай. Тухайн үед Палестины газын зурвасыг зорин хөвж явсан Туркийн хөлөг онгоц руу Израилын цэргийн арми гэнэт халдсанаар сууж явсан туркийн 10 иргэн амиа алдаж байжээ.

Энэ хэргийн улмаас хоёр улсын харилцаа урьд хожид байгаагүй хэмжээнд хурцдаж байсан гэдэг. Түүнээс хойш зургаан жилийг үдсэн ч, хоёр улсын харилцаа царцсан хэвээр байсан  ч, сүүлийн үед сэргэх хандлага ажиглагдаж байсан юм. Үүний илрэл нь Турк нэг долоо хоногийн өмнө Израильд суух Элчин сайдаа томилсон явдал байлаа.

Гэвч Туркийн Ерөнхийлөгчийн энэ удаагийн ярилцлагадаа хэлсэн үг  хоёр улсын харилцааг дахин хурцатгаж болзошгүй байна. Ресеп Тайип Эрдоган Израилыг анх удаагаа Гитлертэй адилтгаж буй нь энэ биш. 2010 оны хэрэг явдлын үеэр ч Израилыг Гитлертэй адилтгаж байжээ. НҮБ-аас гаргасан судалгаагаар Израилын Газын зурвас руу хийсэн довтолгооноор 2251 хүн нас барсан байдаг аж.