Түвдийн бурхны шашны тэргүүн дээрхийн гэгээнтэн 14 дүгээр далай лам манай улсад дөрөв хоногийн хугацаатай айлчилсан билээ.  Тэгвэл өчигдөр хэвлэлийн хурал хийх үеэрээ тэрбээр ирэх онд АНУ-д айлчилж, шинээр сонгогдсон Ерөнхийлөгч Доналд Трамптай уулзах хүсэлтэй байгаагаа илэрхийлсэн тухай “Франц пресс” агентлаг мэдээлсэн байна. Далай лам  өмнө нь АНУ-ын төрийн тэргүүн Барак  Обаматай дөрвөн ч удаа уулзаж байсан бөгөөд хамгийн сүүлд өнгөрөгч зургадугаар сард  Америкт айлчилж байв.

 Харин Д.Трампын талаар тэрбээр “Сонгуулийн сурталчилгааны үеэр  ил шулуухан, замбараагүй ярьдаг байж билээ. Гэхдээ эдүгээ сонгогдчихсон юм чинь бодит байдалдаа нийцүүлж явах байх. Би огт санаа зовохгүй байна” гэжээ. Далай ламыг БНХАУ-ын тал Түвдийг салан тусгаарлахыг дэмжигч тэрслүү этгээд гэж үздэг  бөгөөд түүнийг Барак Обаматай уулзалт хийх үед ч эсэргүүцлээ илэрхийлж байлаа.