Дэлхийн хамгийн хаалттай улс БНАСАУ-ын удирдагч Ким Жон Уны гэргий Ри Сол Жу найман сарын дараа олон нийтийн өмнө гарсан билээ. Тэрбээр өмнө нь хоёр сар тутамд Ким Жон Уны хамт олон нийтийг хамарсан үйл ажиллагаанд оролцдог байсан бол энэ жил найман сарын хугацаанд олны нүднээс дөлсний эцэст саяхан цэргийн үзүүлэх сургуулилтад  оролцсон юм.  Тэгвэл барууны зарим хэвлэлд Ри Сол Жуг энэ хугацаанд Кимийн харгис дэглэмийг залгамжлах нуган үр төрүүлсэн байж магадгүй талаар таамаг дэвшүүлж эхэллээ.

Зарим ажиглагчид өмнө нь Ри Сол Жу аль хэдийнэ харгис удирдагчийн сэтгэлийг татахаа больсон, эсвэл Кимийн дүү Ким Ёо Жуны догшин авираас үүдэн олны өмнө ил гарсангүй гэхчилэн таамаг дэвшүүлж байв. Харин эдгээр таамгын хариулт болж, дахин нэгэн цуу үг гарч ирсэн нь Ри бүсгүй дараагийн удирдагчийг төрүүлсэн байж магадгүй гэх мэдээлэл байлаа.

Хамгийн нууцлагдмал төрийн тэргүүн Ким Жон Ун анхны хүүхдээ төрснийг ч дэлхий нийтээс нууцалж чадсан байдаг.  Түүнийг охинтой гэдгийг сагсанбөмбөгийн од, Кимийн найз Деннис Родман анх удаа олонд дэлгэж байсан удаатай.