Дэлхий дээр 7.4 тэрбум орчим хүн амьдардаг. Гэхдээ эрэгтэй, эмэгтэй нийлсэн ердөө 74 хүн л дэлхийн хувь заяаг шийддэг ажээ. АНУ-ын эдийн засгийн Форбес сэтгүүлээс жил бүр дэлхийн хүн амын 100 сая хүн тутмаас хамгийн нөлөө бүхий, хүчтэй нэг хүнийг тодруулан жагсаалт гаргадаг уламжлалтай.

Дэлхийн хэмжээнд бодлого явуулж, дэлхий дахинд нөлөөлж чадсан хамгийн хүчтэй хүн л жил бүр жагсаалтыг тэргүүлдэг билээ.  Тэгвэл энэ оны сэтгүүлийн жагсаалт гарчээ. Жагсаалтыг гаргахдаа дөрвөн шалгуураар үнэлэх бөгөөд дэлхий даяарх салбар салбарын янз бүрийн амьдралтай зуу зуун хүмүүсийн нэрийг дэвшүүлж рейтингээр нь үнэлсэн байна. Эхлээд нэр дэвшигчдээс хэн нь хамгийн хүчтэй вэ гэдгийг хүмүүсээс асуудаг байна.

Нэр дэвшигч Ромын пап Францис  гэхэд католик шашинт нэг тэрбум хүний санал авч, энэ үзүүлэлтийг тэргүүлсэн байгаа бол Дэлхийн хамгийн том хувийн хэвшлийн ажил олгогч “Wal-Mart Stores”-ын гүйцэтгэх захирал Дог МакМиллон 2.3 сая ажилчдын саналаар хоёрдугаарт бичигджээ.

Харин дараа нь санхүүгээр нь нэр дэвшигчдийг өрсөлдүүлэхэд, дэлхийн хамгийн баян хүн гэгддэг Билл Гэйтс, Саудын Арабын хаан Салман бин Абдулазиз ал Сауд нар бусдыгаа хошуучилсан байна. Харин гурав дахь шалгуурт ердөө 74 хүн үлдсэн байх бөгөөд тэднээс хамгийн нөлөө бүхий эрхмийг тодруулахад ОХУ-ын Ерөнхийлөгч В.Путин бусдыгаа хошуучилжээ.

Тэрбээр дөрвөн жил дараалан ийнхүү тэргүүллээ. Харин хоёрдугаарт АНУ-ын шинэ Ерөнхийлөгч Доналд Трамп эрэмбэлэгдсэн байна. Үл хөдлөх хөрөнгийн магнат энэ оны сонгуульд итгэмээргүй амжилт гаргаж, Ерөнхийлөгчөөр сонгогдсон удаатай. Өмнө нь “Time” сэтгүүл түүнийг оны хүнээр нэрлэж байсан удаатай. В.Путиныг ийнхүү тэргүүлүүлсэн шалтгаанаа сэтгүүл “ОХУ нөлөөлөл дэлхийн бөмбөрцгийн бараг бүхий л газарт хүрч тэлж байна.

Эх орноосоо эхлээд Ойрхи Дорнодын Сири, АНУ-ын Ерөнхийлөгчийн сонгуульд хүртэл өөрийн хүссэнээ авч чадаж байгаа учраас хамгийн нөлөө бүхий эрхмээр нэрлэсэн” гэжээ. Харин АНУ-ын 45 дахь Ерөнхийлөгчөөр сонгогдоод сар гаруй хугацаа өнгөрч буй Доналд Трампын тухайд “Дуулиан шуугианд нэр холбогддог ч түүнийг даваад гарах асар их дархлаатай.

Конгрессын дээд доод танхимд өөрийн дэмжигчидтэй, хувь хүний хөрөнгө нь ч хэдэн тэрбумд хүртлээ өссөн үзүүлэлттэй гарсан учир ийнхүү жагсаалтад багтаасан” гэж тайлбарласан байх юм. Харин жагсаалтын гуравдугаарт Германы канцлер Ангела Меркель нэрлэгджээ. А.Меркель ЕХ-ны хамгийн том эдийн засаг бүхий орон Германыг 11 жилийн турш тасралтгүй тэргүүлж, ирэх жилийн сонгуулиар ч гэсэн дахин канцлерт нэр дэвшихээ мэдэгдсэн юм.

Тус жагсаалтад багтсанаар тэрбээр хамгийн хүчтэй, нөлөө бүхий эмэгтэйгээр ч мөн нэрлэгдэж байна. Жагсаалтын дөрөвдүгээрт БНХАУ-ын Ерөнхийлөгч Си Зиньпин бичигдсэн бол тавдугаарт Ромын пап Францис, үргэлжлүүлэн Жанет Иеллен, Билл Гэйтс, Ларри Пэйж, Нарендра Моди, Марк Зукерберг нар тус тус шилдэг 10-т багтжээ.

Мөн энэ жил шинээр 11 хүн  дэлхийн хамгийн нөлөө бүхий эрхмийн жагсаалтад багтжээ. Тодруулбал, Их Британийн Ерөнхий сайд Тереса Мэй, “Uber”-ын гүйцэтгэх захирал Травис Каланик, “Walt Disney” компанийн гүйцэтгэх захирал Боб Игер, АНУ-ын шинэ дэд Ерөнхийлөгч Майк Пенс, Филиппинийн Ерөнхийлөгч Родриго Дутерте, Шелдон Аделсон нар шинээр хүчирхэг 74 хүний жагсаалтад багтсан бол өмнө нь багтаж байгаад сүүлийн жилүүдэд “сураг алдарсан”  НҮБ-ын шинэ тэргүүн Антонио Гутеррес, Туркийн Ерөнхийлөгч Ресеп Тайип Эрдоган нарын нэр дахин багтжээ.  Антонио Гутерресийн тухайд 2009 оны Хүчирхэг хүмүүсийн жагсаалтад 36 дугаар байрт эрэмбэлэгдэж байсан бол Эрдоган 2011 онд 56-рт бичигдэж байжээ.