“Роетерс” агентлаг олон нийтийн дунд санал асуулга явуулжээ. Тус санал асуулгыг АНУ-ын шинэ Ерөнхийлөгч Доналд Трампын үзэглэсэн лалын шашинт долоон орны иргэдийг хилээр нэвтрэхийг хориглох тухай зарлигийн талаар олон нийт ямар санал бодолтой байгааг тандах зорилгоор зохион байгуулсан аж.

Тэгвэл олон нийтийн санал асуулгын дүнгээр Ерөнхийлөгчийн зарлигийг нийт судалгаанд оролцогчдын 49 хувь нь дэмжиж, эсрэгээр 41 хувь нь дэмжихгүй гэдгээ илэрхийлсэн байна. Харин “мэдэхгүй” гэх хариултыг 10 хувь нь өгчээ.

Зарлигийг дэмжсэн хүмүүсийн тухайд Бүгд найрамдах намыг дэмжигчид байсан бол Ардчилсан намын дэмжигчид эсэргүүцсэн байсан нь анзаарагджээ. Судалгааг өнгөрсөн сарын 30-31-ний өдрүүдэд онлайнаар явуулсан бөгөөд 18-аас дээш насны 1200 гаруй хүнийг оролцуулсан байна.