Монголын Үндэсний бөхийн холбооны Тэргүүлэгчдийн хурал өнгөрсөн оны арваннэгдүгээр сард хуралдаж,   07, 08 тоот тогтоолыг гаргасан гаргасан юм билээ. Энэхүү тогтоол  нь үндэсний бөхийн барилдааны болон барилдааны бус үед допингийн шинжилгээ хийх, допингийн эсрэг дүрэм зөрчсөн бөхөд хариуцлага тооцох зорилготой аж.  Өөрөөр хэлбэл, бөхчүүдийг барилдааны үеэр бус энгийн бэлтгэлтэй үедээ сэргээш хэрэглэсэн эсэхийг түүвэрчилсэн аргаар хянаж, хорт бодисын нийлбэрийг хэрэглэсэн бөхөд хариуцлага тооцох үүднээс дээрх тогтоолыг гаргажээ. 

 

Жил бүрийн наадмын дараа допингийн асуудал босож ирж, лай болдог. Энэ жил гэхэд хоёр бөхөөс илэрсэн гээд нэгийнх нь цолыг хүртэл хураасан. Допинг илэрсэн гэсэн мэдээлэл гарсан цагаас л залуучуудыг өмөөрч, мөнгөгүй хүмүүс рүүгээ халдлаа гээд л бүх нийтээрээ өмөөрсөн. Мөн зарим бөхчүүд допингийн шинжилгээний хариугаа бичгээр авмаар байна гэх зэргээр эсэргүүцлээ илэрхийлсэн. Гэвч Бөхийн холбооныхон ямар ч байсан нэг  бөхийн цолыг хураагаад л өнгөрлөө. Хоёр бөхөөс допинг илэрсэн байхад нэгийнх нь цолыг хурааж байгаа нь ч ямар учиртай юм, бүү мэд. За энэ ч яахав, одоо бүр допингтой тэмцэх нэрийдлээр бөхчүүдийг хагаралдуулах шинжтэй болох нь. 

 

Учир нь дээрх тогтоолын хэрэгжилтийг хангах зорилгоор бөхчүүдээс санал хурааж, хамгийн их саналтайг нь сэргээшийн шинжилгээнд хамруулах юм байх. Үндсэндээ бөхчүүд өөрийн хардаж байгаа бөхийнхөө нэрийг бичиж хайрцганд хийгээд, хамгийн олон санал авсаныг нь шинжилгээнд хамруулах юм байна. Бөөн асуудал дагуулах нь тодорхой. Үндсэндээ Монгол бөхийг сөнөөх нь. Бөхчүүд ч Р.Нямдоржийн “тоглоом” боллоо байна. Допингийн эсрэг арга хэмжээ авч байгааг нь буруутгаагүй. Зөв. Гэхдээ тэмцэх арга нь зөв үү. Юун бөхчүүдээр өөрсдийг нь матуулах вэ. Дээрээс нь “Допингийн эсрэг журам” гээчид зааснаар барилдаанд шөвгөрсөн, мэргэжлийн хүмүүсийн ажиглалтаар, өөрөө хүсэлт гаргасан бөхөөс шинжилгээ авах юм гэсэн. 

 

Ерөнхийдөө жилд 2-3 удаа допингийн шинжилгээ авах юм гэнэ билээ. Гэхдээ хамгийн түрүүнд бол их санал авсан 16 бөхийг допингийн шинжилгээнд хамруулах нь. Тэгээд гадагшаа нөгөө шинжилгээнийхээ дээжийг явуулна. Баахан удаж удаж нэг юм ирнэ. Дараа нь Бөхийн холбоо нэг хоёр хүний нэр зарлана. Тэгээд л бөөн хэрүүл болно доо. Магадгүй энэ бүхний цаана шантаажны бизнес ч яваад байхыг үгүй гэх газаргүй. Учир мэдэх хүмүүс нь тэгж яриад байна. Угаасаа наадмын дараа допингийн асуудал босч ирэхэд дандаа яригддаг. Ядаж байхад манайх өөрсдөө шинжлэхгүй, гадагшаа явуулна. Удаж удаж нэг ирнэ.  Холилдож, солигдож, эсвэл санаатайгаар хийж байгаа юу гэдэг нь ч мэдэгдэхгүй. Хардлага сэрдлэгэ ихтэй л байгаа. 

 

Ядаж байхад журамд нь мэргэжлийн хүний ажиглалтаар гэж зааж өгсөн байгаа юм. Цаашлаад нэг хүн энэ бөхөөс шинжилгээ авна. Допинг хэрэглэсэн байж магадгүй гээд л авах нь л дээ.  Энэ арай л биш ээ. Жаахан сайн барилдаж байгаа бөх бүхнийг намнах нь л дээ янз нь. Хамгийн гол нь манайд допингийн шинжилгээнийхээ хариуг шууд гаргачихдаг бол хамаа алга. Авлаа, хэдхэн хоногийн дараа гарлаа, үнэхээр илэрвэл хариуцлагаа тооцлоо, гүйцээ. Гэвч гадагшаа явууллаа, сар боллоо, цаашлаад хоёр, гурван сар дамналаа, эцэст нь хэн нэг нь допинг хэрэглэсэн хэрэгт унаад л үлддэг.  Энэ асуудал, процессыг нь халмаар байгаа юм. Холбооны хэдхэн хүний эрх ашигтай л холбоотой асуудал болж хувираад, бөхчүүдэд халтай байгаа юм биш үү. Энэ асуудлыг шийдэх цаг болсон. Арай өөрөөр ажилламаар байна. Дахиад хэлэхэд, допингтай тэмцэх нь зөв. Дэлхий нийтэд ч, их спортод ч тэгж л байгаа. Манайх ч гэсэн үндэсний спортдоо тэр жишгийг нэвтрүүлэх хэрэгтэй. Гэхдээ зөвөөр шүү.