Б.ДАВАА

Францын Ерөнхийлөгчийн сонгууль ирэх дөрөв, тавдугаар сард болно. Тодруулбал, ирэх сарын 23-нд эхний шатны сонгуулийн санал хураалт болох бөгөөд хамгийн өндөр хувийн санал авсан нэр дэвшигчдийн хооронд шийдвэрлэх шатны сонгууль тавдугаар сарын 7-нд явагдах билээ. Тэгвэл сонгууль болоход сар орчим хугацаа үлдсэн энэ үед нэр дэвшигчдийн телевизийн халз мэтгэлцээн зохион байгуулагдлаа. Халз мэтгэлцээн орон нутгийн цагаар энэ сарын 20-нд болж, хэт барууны үзэл баримтлалт Үндэсний фронт намаас нэр дэвшиж буй Марин Ле Пен өрсөлдөгчийнхөө ширүүн дайралттай тулгарчээ. Тэрбээр хамгийн сүүлийн үеийн санал асуулгад нэлээд өндөр рейтингтэй яваа бөгөөд Европын холбооноос гарах, цагаачлалын эсрэг хатуу бодлого баримтлана гэх амлалтыг мөрийн хөтөлбөрийнхөө гол заалт болгож буй юм.

Халз мэтгэлцээнийг “TF1” телевиз зохион байгуулсан бөгөөд Ерөнхийлөгчийн сонгуульд нэр дэвшиж буй таван эрхмийг оролцуулж, өөр өөрсдийнх нь баримтлага бодлого чиглэлийнх нь талаар мэтгэлцүүлсэн байна. Улмаар оролцогсдын хоорондын мэтгэлцээн дүрвэгсэд, шашин шүтлэгийн асуудалд ширүүсчээ. Өмнөх Францын үе үеийн төрийн тэргүүнд нэр дэвшигчдийн хооронд энэ удаагийнх шиг ширүүн мэтгэлцээн болж байгаагүй гэдгийг “Франц пресс” мэдээллээ.

Энэ удаагийн үйл ажиллагаанд бие даан нэр дэвшигч Э.Макрон, Бүгд найрамдах намаас нэр дэвшигч, Ерөнхий сайд асан Франсуа Фильон, Социалист намын Боловсролын сайд асан Бенойт Хамон, Зүүн жигүүрийн намын Жан Люк Меленчон, Үндэсний фронт намын Марин Ле Пен гэсэн таван эрхэм оролцжээ.

Францын Ерөнхийлөгчийн сонгуульд нийтдээ 11 нэр дэвшигч өрсөлдөж байгаа. Гэхдээ мэтгэлцээнд улс төрийн жижиг хүчний зургаан төлөөллийг оролцуулаагүй байна. Мэтгэлцээний үеэр популист улстөрийн хүчин болох Үндэсний фронт намын нэр дэвшигч Марин Ле Пений дүрвэгсэд цагаачлалын эсрэг бодлогыг бусад нь эрс ширүүн шүүмжилж, хэд хэдэн удаа хатуухан дайралт хийгээд амжсан байна. Тухайлбал, Ле Пен “Терроризмын аюулаас улс эх орноо хамгаалахын тулд дүрвэгсдийн урсгалыг зогсоох ёстой” хэмээгээд, Франц дахь лалын шашны байгууллагын тоо нэмэгдэж, тус улсын аюулгүй байдал ноцтой хэмжээнд хүрснийг онцолжээ. Харин түүний байр суурийг Э.Макрон үгүйсгэж, “Ле Пен улс орныг хуваахыг хүсч байна” гэж шүүмжилсэн байна.

Мөн Ле Пен Францын эдийн засаг Германы ард бичигдэх болсон нь Европын холбооны өнөөгийн байдал болон еврог гүйлгээнд ашиглаж эхэлснээс шалтгаалсан гэжээ.

Францын иргэдийн дунд явуулсан хамгийн сүүлийн үеийн санал асуулгаар ирэх дөрөвдүгээр сарын 23-ны өдөр явагдах эхний шатны сонгуулийн санал хураалтад Э.Макрон, Марин Ле Пен нар тэргүүлэх төлөв ажиглагджээ. Харин тавдугаар сард болох шийдвэрлэх шатны сонгуульд Макрон ялалт байгуулж, Ерөнхийлөгч болох магадлал өндөр байгаа гэнэ. Гэхдээ судалгаанд оролцогсдын 40 орчим хувь нь хэнийг дэмжихээ хараахан шийдээгүй гэж хариулсан тул сонгууль хаашаа эргэхийг одоогоор таамаглах боломжгүй байна.