МСБХ-ны Үндэсний Дээд лигийн 2022/23 оны улирлын эрэгтэй лигийн плэйоффын эхний шатны цувралын тав дахь тоглолтууд боллоо.

Ням гарагийн өдөр М Гарьд болон Завхан Бродерс багуудын цувралын тав дахь тоглолт тун сонирхолтой болж нэмэлт цагт өндөрлөлөө. Завхан Бродерс баг өнөөдөр хожил байгуулснаар цувралыг 3-2 болгон тэргүүлж эхэлж байна.

ТОГЛОЛТЫН БААТАР: Завхан Брлдерс багийн төвийн тоглогч Даймонд Стөүн өнөөдөр 29 минутыг талбай дээр өнгөрүүлж 39 оноо, 13 самбар, 7 хаалт хийж 71 хувьтай довтолжээ. Фредерик Лиш ердөө 15 минут тоглож 17 оноо авсан байна. Тэрээр тоглолтын чухал үед оноонуудыг авч байснбг дурьдах нь зүйтэй болов уу. Мөн Завхан Бродерс багийн тоглогч Б.Энх-Амгалан өнөөдөр гараанаас тоглолтыг эхлүүлж 12 оноо, 6 самбар авч онцгой тогложээ.

ТОГЛОЛТЫН ЭРГЭЛТИЙН ЦЭГ: Тун өрсөлдөөнтэй өрнөж байсан тоглолтын дөрөвдүгээр үеийн сүүлийн 1 минут эхэлж, Завхан Бродерс баг 89-85 буюу 4 оноогоор хожигдож байхад Б.Энх-Амгалан болон Д.Мөнхтүвшин нарын дараалсан холын зайн шидэлт онооны харьцааг 89-91 болгосон юм. Зөрж О.Эрдэнэцогт 2 оноо авснаар 91-91 болж нэмэлт гарсан байна.

Хоёр багийн тоглолтын нэмэлт цагийн сүүлийн 1 минут 48 секунд дээр Фредерик Лиш сэлгээнээс талбайд гарч ирж дараалан 5 оноо авч багтаа нэг онооны давуу байдлыг авчирж чадсан билээ. Тоглолт 99-101 харьцаатай дууссан.

СТАТИСТИК ХУДЛАА ХЭЛДЭГГҮЙ: Хоёр багийн онооны тэргүүлэл нийт 18 удаа өөрчлөгдөж, 11 удаа онооны харьцаа тэнцсэн нь гайхалтай өрсөлдөөнтэй тоглолт болсныг харуулж байна.