Нийслэлийн хэмжээнд нийтийн тээврийн үйлчилгээ үзүүлж буй том оврын автобусыг ухаалаг системд шилжүүлэн мөнгөний хайрцаг суурилуулсан билээ. Тэгвэл энэ сарын 1-нд нийтийн тээврийн автобусанд суурилуулсан мөнгөний хайрцгийг авч, зөвхөн картаар үйлчлүүлдэг болгоно. Учир нь зарим иргэд мөнгөний хайрцагт тал мөнгө хийх, хоёр өөр дэвсгэртийн мөнгийг нийлүүлж наан хийх зэрэг зөрчил гаргасан учраас ийнхүү шийдвэрлэсэн байна.  Харин маргааш нийтийн тээврийн автобусанд хянагч нар ажиллахаар болсон аж. Тэд энэхүү үйлчилгээнд хяналт тавих үүргийг гүйцэтгэн ажиллах юм байна. 

Тодруулбал, тэд иргэдийг картаар үйлчлүүлж буй эсэхийг шалгаж, төлбөрөө төлөөгүй тохиолдолд тээвэрлэхгүй байх, торгох арга хэмжээ авах ажээ. Дашрамд сонирхуулахад, дээрх арга хэмжээтэй холбогдуулан автобусанд үйлчлүүлэх карт олон төрлийн сонголттой болсон гэнэ.  “Улаанбаатар смарт карт” компанийн энгийн картаас гадна 25 мянган төгрөгөөр картаа цэнэглэсэн тохиолдолд сарын турш хязгааргүй зорчих, банкны тусгай дансанд мөнгө шилжүүлж, гүйлгээний утга дээр нь картын дугаараа бичсэнээр автоматаар сунгаж, ашиглах картыг ч нэвтрүүлжээ. Түүнчлэн 3600 төгрөгөөр худалдан авдаг картыг 2000 төгрөгөөр худалдан авах боломжтой бөгөөд  “Улаанбаатар смарт карт” компанийн Хэрэглэгчийн төв, нийслэлийн Нэгдсэн үйлчилгээний төвийн “Драгон”, “Мишээл”, “Дүнжингарав” салбаруудаас  авах боломжтой.