Нийслэлийн Засаг даргын дэргэдэх зөвлөл хуралдаж авто зогсоол нэмэгдүүлэх асуудлыг хэлэлцжээ. Тус зөвлөлийн зүгээс нийслэлийн авто замын хөдөлгөөний аюулгүй байдлыг хангах, түгжрэлийг бууруулах ажлын хүрээнд Д.Сүхбаатарын талбай орчмын 500 метр радиуст буюу Бага тойруу доторх 84.2 га талбайг 11 блок болгон хувааж судалгаа хийсэн.

Судалгааны үр дүнд иргэд, аж ахуйн нэгж, байгууллагууд өөрийн эзэмшлийн газрыг хайс, хашаа барьж хамгаалснаар зорчих хөдөлгөөний нэвтрэлийг хязгаарлаж, улмаар галын болон түргэний машин зорчиход хүндрэл үүсгэж байгаад дүн гарчээ.

Мөн авто зогсоолууд стандартын шаардлага хангахгүй, тэмдэгжүүлээгүй зэргээс үүдэн жолооч нар автомашинаа эмх замбараагүй байрлуулдаг. Энэ нь явган хүний болон авто замын зорчих хөдөлгөөний эрчмийг сааруулах гол шалтгаан болж байна гэсэн судалгааны дүн гарсан байна.

Тиймээс Хотын захирагчийн дэргэдэх зөвлөл бага тойруу орчмын ил зогсоолыг стандартын шаардлага хангахаар тэмдэгжүүлэх, нэвтрэх чадварыг нэмэгдүүлж түгжрэлийг бууруулах судалгааг Су.Батболд Засаг даргад танилуулсан байна.

Бага тойруу орчим байгаа 23 хашаа саадыг буулгах, гудамж замын хөдөлгөөнийг нээх, улмар стандарт хэмжээтэй 1191 зогсоол байгуулах юм байна. Үүнээс 72 орчим зогсоол нь хөгжлийн бэрхшээлтэй иргэдийн тусгай зогсоол байх аж. Мөн есөн байршилд тохижилт бүхий газар доорх зогсоол, зургаан байршилд олон давхар зогсоол барихаар төлөвлөгөө гаргажээ. Эдгээр ажлыг үе шаттай хийж хэрэгжүүлэх юм байна.