АНУ-ын арми Солонгосын хойг руу байлдааны хөлөг онгоцуудаа илгээгээд байгаа. Тэгвэл үүнтэй холбогдуулан БНАСАУ-ын Засгийн газар өчигдөр мэдэгдэл хийж, “Дайнд бэлэн” гэдгээ зарлалаа. Төрийн мэдлийн “KCNA” агентлаг энэ тухай Гадаад хэргийн яамны хэвлэлийн төлөөлөгчийн мэдээлэлд тулгуурлан дамжуулсан байна. АНУ Солонгосын хойг руу байлдааны хөлгүүдээ илгээсний дараа БНАСАУ-ын зүгээс анх удаагаа албан ёсны байр сууриа илэрхийлсэн нь энэ юм.

Гадаад хэргийн яамны төлөөлөгч “БНАСАУ-ын хил рүү хууль бусаар нэвтэрсэн АНУ-ын бодлогогүй шийдвэр ноцтой хэмжээнд хүрснийг энэ удаагийн үйл явдал харууллаа. Тиймээс Хойд Солонгос ч АНУ-ын хүсээд буй дайны бэлтгэлээ хангаж байна”  гэж ярьжээ.

АНУ-ын арми энэ сарын 6-нд Сирийн агаарын бааз руу пуужин харвасан. Энэ нь Пхеньян руу чиглэсэн сүрдүүлгийн нэг хэлбэр байсан гэж зарим ажиглагчид онцолж байна. Тэдний үзэж буйгаар Сири рүү пуужин харвасан нь Хойд Солонгосын цөмийн хөтөлбөрийг зогсоох чиглэлд Д.Трампын баримтлах бодлогын бүхий л хувилбарыг тод харуулсан гэнэ.

Д.Трампын хувьд өмнө нь Пхеньяны цөмийн хөтөлбөрийн эсрэг БНХАУ дорвитой арга хэмжээ авахгүй байсан ч, АНУ дангаараа тэмцэхэд бэлэн гэдгээ мөн мэдэгдэж байсан удаатай. Гэвч БНАСАУ-ын Гадаад хэргийн яамны төлөөлөгч “Бид өөрийн хил, газар нутгаа хамгаалахыг тулд хүчирхэг зэвсэг техникээ ашиглаж, өдөөн хатгасан хэнбугай руу ч хариу цохилт үзүүлэх болно” гэж ярьжээ.

АНУ-ын тэнгисийн хүчин 100 мянган  тонн жинтэй “USS Carl Vinson” нисэх онгоц тээвэрлэгчийг дагалдах хөлгүүдийн хамт Номхон далайн баруун хэсэгт шилжин байрлах тушаал өгсөн. Үүний зорилго нь  Хойд Солонгосын дэглэмд дарамт шахалт үзүүлэх байв. Гэвч, Пхеньян өмнө нь ч, одоо ч АНУ-ыг сөрөх хангалттай хүчтэй зэвсэгтэй гэдгээ мэдэгдсээр байгаа юм.

Он гарсаар Хойд Солонгос тив хоорондын баллистик пуужинг хэдэнтээ туршсан. Хамгийн сүүлд өнгөрсөн долоо хоногт БНХАУ-ын дарга Си Зиньпин АНУ-ын Флорида мужид айлчилж, Ерөнхийлөгч Д.Трамптай албан уулзалт хийхээс өмнө Япон тэнгисийн зүг баллистик пуужин харвасан юм.  БНСУ-ын шинжээчдийн үзэж буйгаар БНАСАУ-ыг үүсгэн байгуулагчийн мэндэлсний 105 жилийн ойн өдөр буюу  энэ сарын 15-нд ч дахин баллистик пуужин харваж магадгүй гэнэ.

Гэвч, эсрэгээрээ АНУ-ын уг арга хэмжээ Солонгосын хойгийн хэдэн мянган жирийн иргэнийг эрсдэлд оруулж болзошгүйг ч холбогдох мэргэжилтнүүд анхааруулж байна. Тодруулбал,  Ардчилсан намын конгрессийн гишүүн, АНУ-ын агаарын хүчний чөлөөнд гарсан хурандаа Тэд Лью твиттер хуудастаа Доналд Трампад хандан “Хойд Солонгос бол Сири биш. Тэд цөмийн зэвсэгтэй, Өмнөд Солонгосыг сүйрүүлэх чадвартай. Таны хийж байгаа алхам Солонгосын хойгийн олон сая хүнийг үхэлд хүргэх эрсдэлтэй” гэж бичжээ.  Мөн “Хэрвээ ингэж сүр хүчээ үзүүлсний дараа Хойд Солонгос пуужингийн туршилтаа хийвэл яах вэ. Тэдэнд цохилт өгөх үү” гэж асуусан байна.
Энэ мэтээр Солонгосын хойгт үүссэн нөхцөл байдал туйлын эгзэгтэй болж эхэлмэгц БНХАУ аюулгүй байдлаа чангатгаж, хил рүүгээ цэрэг илгээсэн гэх мэдээлэл байгаа юм. Тус улсын дарга Си Зиньпин өнгөрсөн долоо хоногт Д.Трамптай уулзсаныхаа дараа байдал хаашаа ч эргэж магадгүйг өөрийн нүдээр харсан учир болзошгүй нөхцөл байдал буюу Солонгосын хойгт дайн гарсан тохиолдолд тус улсыг зорин ирэх дүрвэгсдийн урсгалаас сэргийлэх зорилгоор хилээ чангатгаж эхэлсэн бололтой.