2017-2018 оны хичээлийн жилд ерөнхий боловсролын сургуулийн нэгдүгээр ангид элсэгчдийн бүртгэл өнгөрсөн дөрөвдүгээр сарын 28-нд эхэлсэн билээ. Харин элсэгчдийн бүртгэлийн үйл ажиллагаа энэ сарын 15-нд дуусах талаар Нийслэлийн боловсролын газраас анхаарууллаа.  Энэ хичээлийн жилд ЕБС-ийн I ангид зургаан настай 32623 хүүхэд  элсэнэ.

Элсэлтийг  2017-2018 оны хичээлийн жилийн  хувьсах зардал, төсвийг бодитой төлөвлөх, бүлэг дүүргэлтийн нормыг баримтлах, хичээлийн ээлжийн тоог аль болох нэмэгдүүлэхгүй байх зорилгоор  Монгол Улсын Засаг захиргаа нутаг дэвсгэрийн нэгж, түүний удирдлагын  тухай хуулийн 33 дугаар зүйлийн 33.5, Боловсролын тухай хуулийн 28 дугаар зүйлийн 28.1.1, 28.1.4,  Бага дунд боловсролын тухай  хуулийн 7 дугаар зүйлийн 7.2, 12 дугаар зүйлийн 12.4,  БСШУ, НХХ, Сангийн сайдын 2007 оны 307/91/237 дугаар хамтарсан тушаалын хавсралтаар батлагдсан “Цэцэрлэг, ерөнхий боловсролын сургуулийн багшийн ажлын норм тогтоох, багш зарим албан тушаалтны цалин хөлсийг тооцож олгох журам”-ын 1 дүгээр хэсгийн 1.4, хамран сургах тойрог тогтоох тухай, нийслэлийн Боловсролын газрын даргын тушаалыг  тус тус үндэслэн  зохион байгуулж байгаа хэмээн Нийслэлийн боловсролын газраас мэдээллээ. 2016-2017 оны нэгдүгээр ангид 2011 оны нэгдүгээр сарын 1-нээс  2011 оны арванхоёрдугаар сарын 31-нийг дуусталх хугацаанд төрсөн  бүх хүүхдийг элсүүлнэ. Харин таван настай буюу 2012 оны нэгдүгээр сарын 1-нээс хойш төрсөн хүүхдийг бүртгэхгүй аж.

 

Элсэгчид бүртгүүлэхээр ирэхдээ төрсний гэрчилгээ, эцэг эх болон асран хамгаалагчийн  цахим  үнэмлэхний  эх хувь  болон хуулбар,  3х4 хэмжээтэй нэг хувь чээж зураг авч ирэх шаардлагатай юм байна. Мөн шаардлагатай тохиолдолд сургууль нэмэлт материал авах аж. Түүнчлэн хамран сургах тойргийн хүүхдийг ямар нэг элсэлтийн шалгалтгүйгээр бүртгэж, элсүүлэх бөгөөд элсэгчдээс бүртгэлийн хураамж бусад төлбөр авахгүй юм байна.