Ерөнхийлөгчийн ээлжит сонгуулийн дахин санал хураалт маргааш болно. Монгол Улсын түүхэнд анх удаагаа болж буй зүйл. Тийм болохоор хүмүүс бага ойлголттойн дээр дахин санал хураалтад жаахан хойрго хандах магадлал өндөр байна. Ядаж байхад яр гэгчээр цагаан санал өг гэж уриалах бүхэл бүтэн нам, хэсэг бүлэг этгээд гараад ирчихлээ.

Тэд цагаан санал өгснөөр намууд ялахгүй, ард түмэн ялах учиртай. Тэдэнд сануулга өгье гэх мэт зүйлийг ярьж байна. Бүр улаан цагаандаа гараад нэр хүндтэй, олны танил болсон хэний ч хамаагүй зургийг тавьж, “Цагаан санал” гэсэн уриалга гаргаж ч байх шиг. Арай л гадаадын кино жүжигчид, дуучдын зургийг тавих нь холгүй байна. Энэ бүгдэд автаж буй залуучууд ч цөөнгүй байгаа.

Гэхдээ нэр төртэй хүмүүс ингэж хууль бусаар сонгуулийн сурталчилгаанд өөрийнх нь зургийг ашигласныг зүгээр өнгөрөөхгүй байх. Нөгөө талдаа цагаан сонголт гэж уриалаад байгаа хүмүүсийн үгэнд автаж, ард түмэн ялна гэсэн хоосон урианд нь итгэхгүй байхыг залуучууд, иргэдээс хүсмээр байна.

Дахин санал хураалттайгаа нийлээд Засгийн газар 20 гаруй тэрбум үрж байгаа. Цэцэрлэг, сургууль барих, бүтээн байгуулалт хийх болохоор мөнгөгүй гээд татагнаад байдаг Монгол Улсын Засгийн газар сонгуульд бол зүгээр л цацдаг юм байна.

Ядаж байхад эх орондоо хайртай гэж худлаа сүржигнэдэг, аль хэдийн өвдөг шороодсон зарим нэг хүн “Цагаан сонголт” гэж уриалаад сууж байгаа нь ямар их худал хуурмаг вэ гэж дуу алдахаар болчихож. Цагаан сонголт гэж уриалаад байгаа хүмүүс ялаад, тунаж үлдсэн хоёр нэр дэвшигчийн хэн нь ч 50 хувиас дээш санал авахгүй байя гэж бодъё.

Тэгвэл дахиад өөр гурван хүн гарч ирж, Ерөнхийлөгчийн сонгуульд өрсөлдөнө. Дахиад 14, 15 тэрбум төгрөг үрнэ. Хэн нэг нь олонхийн санал авахгүй бол нэмэлт санал хураалт явна. Ингээд л үргэлжлээд байх уу. Эсвэл хэн нэг нь найдвартай ялна гээд найдаж суух уу. Ийм дүүрчихсэн тэнэг юм гэж байж болохгүй ээ. Тэгж байхаар залуус минь бүгдээрээ идэвхтэй саналаа өгцгөөе. Бүр тэгэхээс тэгэх гэж 100 хувь саналаа өгцгөөе.

Итгэл үнэмшлээ дагаж, хэн нэгнийг нь дэмжиж гаргая. Нэгдүгээрт, улсын энэ их мөнгө төгрөг хий дэмий урсахаас сэргийлэх хэрэгтэй. Хоёрдугаарт, цагаан сонголт нэрийн цаана нуугдаж байгаа алив хар муу бүхнээс сэргийлэх цаг болсон. Тэртээ тэргүй ирэх ням гараг ажлын өдөр болчихсон. Тиймээс түүнээс өмнө хөдөө гадаа явна гэж байхгүй.

Даваа гарагаас л наадам наргиан, амралт зугаалга эхлэх байх. Тиймээс баасан гарагт нийтээрээ, дорвитойхон саналаа өгчих хэрэгтэй юм. Сонгуульдаа идэвхтэй оролцмоор байна аа, залуус аа. Сошиалд хий бухимдаж, ухаантай ухаантай юм бичиж, эсвэл хэн нэгнийг сохроор дагаж, хар  пиарт автаж сууснаас дөрвөн жилдээ ганц, хоёрхон удаа олддог төрийн эрх барихад нөлөөлөх эрхээ эдлэх хэрэгтэй шүү дээ.

Миний саналаар дутав л гэж, санал өгөхгүй байлаа гээд яадаг юм гэж бодож яваа бол буруу. Таны саналаар дутдаг юм. Хэн нь ч гэсэн. Санал өгөхгүй бол ирц, дүн хүрэхгүй, дахин санал хураалт болж байгаа биз. Тэгээд ард түмэн бидний хуруу хумсаа хуйхлаж хэдэн төгрөгөөс авсан татварын мөнгөөр дахиад л сонгуульдана.

Энэ янзаараа хэн хэнийгээ бойкотлоод яваад байвал хэчнээн ч удаан сонгуульдаж магадгүй. Заавал нэг Ерөнхийлөгчтэй болж байж л сална.  Тиймээс л саналаа өгчих хэрэгтэй. Уг нь эхний сонгуулиар залхуурч хэвтсэн 600 мянган сонгогч саналаа өгчихсөн бол бид дахиад 7.2 тэрбум төгрөг үрэхгүй, дахин санал хураалт гэж заваарахгүй л сууж байх байлаа.

Гэвч үүргээ мэддэггүй, хий эрх чөлөө ярьсан, хамраасаа цаадахыг харж чаддаггүй олон хүнээс болоод нийт монголчууд хохироод л сууж байна шүү дээ. Тиймээс та идэвхтэй бол, тэгээд хажууд чинь унтахаас өөр шидгүй, юугаа ч ойлгохгүй, миний саналаар дутахгүй гэсэн хар бодолтой нөхөр байгаа бол чирж гараад, саналыг нь өгүүлээрэй. Дахиад бидэнд 10, 20 тэрбумаар сонгуульдах чадал байхгүй.