НҮБ-ын Аюулгүйн зөвлөл, олон улсын нийгэмлэгийн зүгээс тавьж буй шаардлагыг үл ойшоож, Хойд Солонгос улс ням гарагт устөрөгчийн бөмбөг туршсанаа мэдэгдсэн билээ. Тэгвэл эл туршилтын дараа агаар мандалд ямар нэг цацраг идэвхит туяа бүртгэгдээгүй талаар Хятад, Япон улсын албаныхан өчигдөр мэдэгдлээ.

Тус цөмийн зэвсгийн газар доорх дэлбэрэлтээс алдагдсан хорт туяа агаар мандалд тархах вий гэсэн айдас хил залгаа улс орнуудын санааг зовоож байсан юм. Ням гарагийн туршилтын дараа Япон даяар ажиллаж байгаа агаарын хяналтын байгууламжуудад ямар нэг онцгой зүйл бүртгэгдээгүйг тус улсын засгийн газрын төлөөлөгч Ёшихидэ Суга  мэдээлжээ.

Хятадын байгаль орчны яам мөн Хойд Солонгосын хил орчмын агаар мандалд нөхцөл байдал хэвийн байгааг мэдээлсэн юм.  Тус яамны вэб сайтад “Хойд Солонгосын цөмийн туршилт одоогоор манай улсын байгаль орчин, хүн амд ямар нэг нөлөө үзүүлэхээргүй байгаа нь хэмжилтээс харагдаж байна” гэсэн байна.

Түүнчлэн, Японы батлан хамгаалахын сайд Ицунори Онодера агаар мандал дахь цацраг идэвхийн хэмжээг тодорхойлох багажтай нисэх онгоцнууд хөөргөхөөр бэлдэж байгаагаа мэдээлж байв.

Хойд Солонгосын устөрөгчийн бөмбөгийн туршилтын үеэр хоёр дараалсан дэлбэрэлт бүртгэгдсэн байдаг. Энэ нь бүс нутгийнхныг болгоомжлоход хүргэж байв. Эхний дэлбэрэлтээс ердөө найман минутын дараа болсон хоёр дахь дэлбэрэлт нь туршилт явуулсан хонгилын системийн эвдрэл байж магадгүй хэмээн мэргэжилтнүүд сэжиглэж байжээ. Хэрвээ ийм зүйл тохиолдсон бол цацраг идэвхит бодис алдагдах аюултай юм байна.  Зургаа дахь удаагаа зохион байгуулсан Хойд Солонгосын цөмийн туршилт урьд өмнөх туршилтуудаас олон дахин хүчтэй болсон гэгдэж байгаа. Тухайлбал тав дахь туршилтаас 5-6 дахин, дөрөв дэх туршилтаас 11 дахин хүчтэй болсныг мэргэжилтнүүд хэмжсэн байна.

Тэгвэл Хойд Солонгосын эл туршилттай холбогдуулан Өмнөд Солонгос ч мөн ням гарагийн орой пуужингийн туршилт хийсэн юм. Тэд туршилтын талбайгаас Хойд Солонгосын цөмийн зэвсгийн хөгжүүлэлт хийх талбай хүртэлх зайг хэмжиж, түүнтэй яг ижил зайтай байг Япон тэнгист байршуулан “Хёнму” гэх богино зайн тусгалт баллистик пуужинг туршсан байна. Тус улсын цэргийн албаныхны мэдээлээр пуужин яг байндаа тусчээ. АНУ-ын Цагаан ордон ч гэсэн Пхеньяны цөмийн туршилттай холбоотойгоор байр сууриа илэрхийлээд байгаа билээ. Тэд өөрийгөө болон холбоотнуудаа хамгаалахын тулд Хойд Солонгосын эсрэг цөмийн зэвсэг ашиглахад бэлэн гэдгээ мэдэгдээд байгаа юм. АНУ-ын Ерөнхийлөгч Доналд Трамп Японы Ерөнхий сайд Шинзо Абэтэй утсаар ярихдаа энэ тухай мэдэгдсэн аж. Ямартай ч, Пхеньян зургаа дахь удаагийн цөмийн туршилтаа хийсэнтэй холбоотойгоор бүс нутгийн байдал улам хурцдаад байна.