АН-ынхан намын бодлогоо эсэргүүцсэн гэх үндэслэлээр намын гишүүдээ “агнаж” эхэлсэн.  Тэгвэл Ерөнхий сайд У.Хүрэлсүх ч “их цэвэрлэгээ”-гээ кабинетээсээ эхлүүллээ. Түүний тэргүүлж буй Засгийн газрыг огцруулах асуудлыг УИХ-ын чуулганаар хэлэлцэж байх үед энэ Засгийн газар огцрох ёстой хэмээн байр сууриа илэрхийлж, санал хураалтад ч энэ байр сууринаасаа хандсан БСШУСС-ын сайд Ц.Цогзолмаа сайдын суудлаасаа буух нь тодорхой болов.

Гэхдээ чуулганы энэ хуралдааны үеэр гишүүд У.Хүрэлсүхэд таны Засгийн газар хэвээр үлдвэл Сангийн сайдаа солиорой гэж захиж байсан ч Сангийн сайдаас БСШУСС-ын сайд Ц.Цогзолмаа  түрүүлж ажлаа өгнө гэх яриа улс төрийн хүрээнийхний дунд яригдсаар байсан. Тэгвэл энэ биеллээ олох нь ээ.

Учир байдлыг гадарласан Ц.Цогзолмаа сайд өчигдөр Ерөнхий сайдтай уулзаж, “Сайдын суудлаа авбал татгалзахгүй. Гэхдээ би өргөдлөө түрүүлж өгөхгүй” хэмээн байр сууриа илэрхийлжээ. Ингээд Ерөнхий сайд түүнийг огцруулах хүсэлтийг Ерөнхийлөгчид зөвшилцөхөөр өгсөн. Ерөнхийлөгч ч огцруулах нь зүйтэй гэсэн хариуг өгсөн байна. Ц.Цогзолмаагийн хувьд М.Энхболдтой олон жилийн турш хамтран ажиллаж, ойрын түнш нь байсан учраас үзэл бодол, байр суурьтаа үнэнч байгаа нь улстөрч хүнд байх зарчим гэж үзэж байгаа биз. Тэрбээр албан тушаалын төлөө нөхрөө хаясангүй. Үүнийх нь төлөө түүнд "Браво" гэж хэлмээр байна.