Монголын үйлдвэрчний эвлэлийн холбооноос 2016 оны төсвийн тодотголын талаар өнөөдөр хэвлэлийн бага хурал хийлээ. Тус хуралд Монголын Үйлдвэрчний Эвлэлийн Холбооны Ерөнхийлөгч Х.Амгаланбаатар, ЭМАҮЭ-ийн дарга Б.Мягмар, ТЗҮЭХ-ны дарга Х.Эрдэнэ нар оролцлоо.

 

Хурлын үеэр Монголын Үйлдвэрчний Эвлэлийн Холбооны Ерөнхийлөгч Х.Амгаланбаатар “Манай холбоонд 2016 төсвийн тодотголын талаар иргэд болон гишүүдийн олон гомдол ирсэн. Төсвийн тодотголын хөдөлмөр, нийгмийн хамгааллын асуудлуудыг хүрсэн түвшингээс дордуулсан олон олон шийдвэрүүд туссан байна.

 

Тухайлбал, төрийн албан хаагч тэтгэвэрт гарахад олгох нэг удаагийн тэтгэмжийг гурав дахин бууруулах тухай орсон. Энэ бол маш буруу. Үүнээс болж олон хүн хохирч, амьдрал нь дордоно. Мөн бүтцийн өөрчлөлт нэрийн дор мэргэшсэн төрийн албан хаагчдыг хоморголон халах, эдийн засгийн хямрал ард иргэдэд хүндээр тусч байгаа үед татварын хөнгөлөлтөөр иргэдээ дэмжихийн оронд Нийгмийн даатгалын тэтгэврийн санд ажилтан болон ажил олгогчоос төлөх шимтгэлийн хувь хэмжээг таван нэгжээр үе шаттай нэмэгдүүлэх зэрэг олон буруу шийдвэрийг гаргалаа. МАН-ын мөрийн хөтөлбөрт туссан шийдвэрүүд нүдээ олоогүй байна.

 

2016 оны төсвийн тодотгол иргэдийн амьдралыг улам доройтуулна” гэсэн юм. Мөн тэрбээр, энэ сарын 23-ны өдөр Засгийн гзараас Монгол Улсын 2016 оны төсвийн тухай хуульд нэмэлт, өөрчлөлт оруулах тухай, Нийгмийн даастгалын сангийн 2016 оны төсвийн тухай, Хүний хөгжил сангийн 2016 оны төсвийн тухай хуульд өөрчлөлт оруулах хуулийн төслийг УИХ-д өргөн барьсан. Гэвч асуудлыг авч хэлэлцсэнгүй. Тиймээс Хөдөлмөр, нийгмийн зөвшлийн гурван талт Үндэсний хороог яаралтай хуралдуулж, энэ асуудлыг шийдэхийг хүсч байгаагаа онцолсон.