Эри Тосака: Барилдааны сүүлчийн мөч хүртэл гагцхүү ялна л гэж бодсон : Тал нутгийн цахим мэдээлэлийн сайт

Ургац хураалтад оролцохыг...

Эри Тосака: Барилдааны сүүлчийн мөч хүртэл гагцхүү ялна л гэж бодсон

Даваахүү 2016-09-06

Бразилийн Рио де Жанейро хотноо болсон 31 дэх удаагийн зуны Олимпийн наадмын чөлөөт бөхийн 48 кг-ын жинд алтан медаль хүртсэн Японы бөх Эри Тосакагийн товчхон ярилцлагыг энэ удаагийн “Оддын цаг” буландаа орчуулан хүргэж байна. Эдүгээ 23 настай дэлхийн гурван удаагийн аварга тэрбээр алтын төлөө Азербайжаны бөх Мария Стадниктай таарч 3:2 гэсэн онооны харьцаатайгаар ялсан билээ.

-Олимпоос алтан медаль хүртэх тамирчны нэгд та зүй ёсоор тооцогдож байсан. Тэр ч биеллээ олж Олимпоос алтан медаль хүртсэн шүү дээ. Таны яг одоогийн сэтгэгдлийг сонсмоор байна?

-Тааварт багтаж байсан. Гэхдээ яг тэмцээн эхлээд барилдах тэр мөчид ялагдчих вий гэдгээс айсан шүү. Мэдээж алтан медаль авсан болохоор сэтгэл хангалуун байна.

-Ердөө таван секунд үлдсэн байхад барилдааныг өөрийн талд эргүүлж чадсан. Тэр үед юу бодогдож байв?

-Ямар ч байсан алтан медаль авах юм шүү гэж өөрийгөө зоригжуулж байсан. Барилдааны сүүлчийн мөч хүртэл гагцхүү ийм л бодолтой байлаа.

-Сүүлийн алтан медалийн төлөөх барилдааны хоёрдугаар үед Азербайжаны бөх Мария Стадникээс илт давуу байх шиг санагдсан?

-Анхнаасаа л аль аль тамирчин нь ялна гэсэн бодолтой барилдаандаа ордог. Тийм зүйл бодож сатаарахыг хүсээгүй.

-Харүка Тачимотогоос медалийг нь авч үзэж байгаа харагдсан. Хүний медалийг харах, өөрөө тэр медалийг зүүх хоёрын ялгаа?

-Ялгаатай байлгүй яах вэ. Харүка Тачимотогийн медалийг хараад “Би ч гэсэн аваргалчих юмсан” гэж битүүхэн цагаан атаархал тээж байснаа нуугаад яах вэ. Хүмүүс харахад энгийн нэг медаль боловч тамирчин хүний хувьд өнөөдрийг хүртэлх хөдөлмөр зүтгэлийнх нь шагнал байдаг юм. Тийм болохоор тэр алтан медаль надад их хүнд санагдсан.

-Харүка Тачимототой ямар холбоотой юм бэ?

-Бидний аавууд нэг ангийнх юм.

-Аав тань ч гэсэн спортоор хичээллэдэг байх нь ээ?

-Тэд хоёулаа жүдо бөхөөр хичээллэж байсан. Гэхдээ манай аав дунд сургууль хүртлээ л барилдсан.

-Дараагийн олимп Токиод болно. Энэ удаагийн амжилтаа бататгахын тулд одооноос олимпдоо бэлтгэх үү?

-Бэртэл авсан учир юун түрүүнд түүнийгээ эмчлүүлж, ирэх дөрвөн жилд барилдахад ямар нэг асуудалгүй болох хэрэгтэй . Дараа нь харин Токиогийн олимпид анхаарлаа төвлөрүүлж, бүх л хүчээ дайчлан бэлтгэлээ хийх болно.

Сэдвүүд : #Ярилцлага

ХОЛБООТОЙ МЭДЭЭ

МЭДЭЭНИЙ СЭТГЭГДЭЛ

АНХААРУУЛГА:Уншигчдын бичсэн сэтгэгдэлд mminfo.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 99998796 утсаар хүлээн авна.