Замын-Үүд боомтын гаалийн хяналтын бүсэд бөөгнөрөөд байгаа хоосорсон чингэлгүүдийг БНХАУ-ын хилийн Эрээн боомт руу буцааж эхэлжээ. Уг ажлыг энэ долоо хоногт шат дараатай эхэлж байгаа аж. Хоосон чингэлгүүдийг ачаа бараа хүлээн авч буй ажлын цагтай уялдуулан 18.00 цагаас буцаан тээвэрлэж байна. Ингэхдээ чингэлгүүдээс дээж аван шинжилж байгаа юм. Чингэлгээр ачаа бараа татан авах болон хоосорсон чингэлгүүдийг БНХАУ-ын талд буцаан хүлээлгэн өгөхөд хоёр тал халдвар хамгааллын дэглэмийг чанд сахиж, хилийн тэг цэг дээр болон бүс нутгийн логистикийн төв дээр ариутган халдваргүйжүүлж буй. Өнөөдрийн байдлаар улсын хилээр 770 чингэлэг бараа бүтээгдэхүүнийг татаж аваад байна.