Аймгийн Засаг даргын Тамгын газар, Байгаль орчин аялал жуулчлалын газраас хамтран зохион байгуулсан  “Ногоон Эрдэнэт” зөвлөгөөн өндөрлөлөө. 

Монгол Улсын Ерөнхийлөгчийн санаачилгаар хэрэгжиж буй Тэрбум мод үндэсний хөдөлгөөний хүрээнд Орхон аймаг Ногоон Эрдэнэт хөтөлбөрийг батлуулан хэрэгжүүлж хөтөлбөрийн танилцуулга болгож уг зөвлөгөөнийг зохион байгуулжээ. 

Зөвлөгөөнийг нээж аймгийн Засаг дарга С.Батжаргал үг хэлсэн бөгөөд урилгаар Монгол улсын Ерөнхийлөгчийн Тамгын газрын дэд дарга А.Үйлстөгөлдөр, Улсын Их Хурлын гишүүн Д.Батлут, Байгаль орчин аялал жуулчлалын сайд Б.Бат-Эрдэнэ, Эрдэнэт Үйлдвэр ТӨҮГ-ын Ерөнхий захирал Х.Бадамсүрэн нар оролцож үг хэлж мэндчилгээ дэвшүүлсэн. 

Мөн аймгийн Засаг дарга С.Батжаргал нийгмийн хариуцлагын хүрээнд мод тарьж ургуулах аж ахуйн нэгж байгууллагуудтай хариуцлагын гэрээнд гарын үсэг зурлаа. Үүнд: “Эрдэнэт Үйлдвэр” ТӨҮГ 10 сая мод, “Эрдмин” ХХК 2 сая ширхэг мод , “Ачит Ихт” ХХК 3 сая ширхэг мод , “Зэс Эрдэнийн хувь” ХХК 1,5 сая ширхэг мод, “Ган сэнтий” ХХК 10,000 ширхэг мод тарих ажээ. 

Зөвлөгөөнд “Тэрбум мод” үндэсний хөдөлгөөнийг хэрэгжүүлэх стратеги, үйл ажиллагааны төлөвлөгөөний танилцуулга, “Ногоон Эрдэнэт” хөтөлбөрийн танилцуулга, Мод тарих болон мод үржүүлгийн газар байгуулах байршлын төлөвлөлтийн танилцуулга, “Тэрбум мод” үндэсний хөдөлгөөн, “Эрдэнэт Үйлдвэр” ТӨҮГ-ын оролцоо  гэсэн илтгэлүүд тавигдлаа. 

Үүний дараа оролцогчид болон илтгэгчид, холбогдох байгууллагуудын дунд асуулт, санал хүсэлт явж мэдээлэл солилцсоноор бөгөөд зөвлөгөөнд оролцогчид үндэсний хөдөлгөөнийг дэмжин ажиллана гэдгээ илэрхийлж байдаа. 

Зөвлөгөөний төгсгөлд "Мод тарих арга зүй" сургалтад хамрагдсан иргэдэд гэрчилгээ олгосноор энэ удаагийн зөвлөгөөн өндөрлөлөө.