Худалдаа хөгжлийн банкны ТУЗ-ийн дарга Д.Эрдэнэбилэгийг цагдан хорих саналыг АТГ-аас прокурорын байгууллагад хүргүүлжээ.

Прокурорын байгууллага уг саналыг Баянзүрх, Сүхбаатар, Чингэлтэй дүүргийн эрүүгийн хэргийн анхан шатны шүүхэд өчигдөр /2022.04.20/ шилжүүлсэн байна. Тус шүүхэд өнөөдөр /2022.04.21/ 09:00 цагт Д.Эрдэнэбилэгийг цагдан хорих эсэх саналыг хэлэлцэв.

Баянзүрх, Сүхбаатар, Чингэлтэй дүүргийн эрүүгийн хэргийн анхан шатны шүүхийн хэвлэлийн ажилтан З.Баяржаргал "Нийслэлийн Прокуророос Эрүүгийн хэрэг хянан шийдвэрлэх тухай хуульд заасан үндэслэлээр яллагдагч Д.Эрдэнэбилэгт урьд авсан Монгол Улсын хилээр гарахыг хязгаарлах хязгаарлалт тогтоох таслан сэргийлэх арга хэмжээг өөрчилж, 2022 оны дөрөвдүгээр сарын 21-ний өдрөөс эхлэн нэг сарын хугацаагаар цагдан хорих таслан сэргийлэх арга хэмжээ авлаа.

Мөн яллагдагч М.Мөнхбаатарт урьд авсан барьцаа авах таслан сэргийлэх арга хэмжээг өөрчилж, нэг сарын хугацаагаар цагдан хорих таслан сэргийлэх арга хэмжээ авахаар шийдвэрлэсэн" гэлээ.