Монголын татварын албанаас 23 дахь жилдээ “Татвар төлөгчдийн өдрүүд”-ийг энэ сарын 9-13-ны өдрүүдэд “Та баялаг бүтээгч” уриан дорж зохион байгуулж байна. Өнөөдөр   Орхон аймгийн 2021 оны шилдэг татвар төлөгчөөр шалгарсан ААН, иргэдэд “Шилдэг татвар төлөгч” шагналыг гардууллаа. 

Улс эх орныхоо дээшлэн дэвжих сан хөмрөгийг арвижуулах, үндсэн хуулиар хүлээсэн үүргээ биелүүлэн бусдыгаа манлайлан ажилласан аймгийн шилдэг татвар төлөгчдөд Засаг даргын нийгмийн асуудал хариуцсан орлогч А.Түвшинжаргал баяр хүргэлээ. Тэрээр, Орхон аймагт 5200 гаруй аж ахуйн нэгж, 70 гаруй мянган татвар төлөгч иргэн байна. Үйл ажиллагаа явуулж байгаа аж ахуйн нэгж байгууллага, иргэн татвар төлөх нь зайлшгүй  хүлээсэн үүрэг нь. Бусдыгаа манлайлан татвараа цаг хугацаанд нь төлдөг иргэн, ААН-ээ шалгаруулах нь төрийн бодлогоор дэмжиж урамшуулж байгаагийн нэг хэлбэр юм.  Та бүхний төлсөн татвар  улс, орон нутагт эдийн засгийн  хөгжлийг авчирч Монгол Улсын тусгаар тогтнол, аюулгүй байдал, ард түмний соёл  боловсрол, ахмад үеийнхний халамж тэтгэвэр, иргэдийн эрүүл мэндийн нэн тэргүүний асуудлыг шийдвэрлэхэд хэзээд үнэтэй хувь нэмэр байсаар ирсэн” гэлээ.

2021 оны улс орон нутгийн төсөвт 2,3 тэрбум төгрөгийн татвар төвлөрүүлэн санхүү, татварын тайлангаа хуульд заасан хугацаанд тогтмол өгч хуулиар хүлээсэн үүргээ биелүүлэн бусдыгаа манлайлан ажилласан  “ЭРДМИН” ХХК Орхон аймгийн том татвар төлөгчдийн ангилалд шилдэг татвар төлөгчөөр шалгарав. 

• Аймгийн дунд ангиллын шилдэг татвар төлөгч ААН-ээр 1,7 тэрбум төгрөгийн татварыг улс, орон нутгийн төсөвт төвлөрүүлсэн “ОРА МЕТАЛЛ” ХХК,  203 сая төгрөгийн татвар төвлөрүүлсэн “БҮТЛИЙН УНДАРГА”ХХК, 
• Жижиг ангиллын шилдэг татвар төлөгч байгууллагаар 41,1 сая төгрөгийг улс орон нутгийн төсөвт төвлөрүүлсэн “ОРДА ЗААН ХОШУУ” ХХК, 
• Бичил ангиллын шилдэг татвар төлөгч байгууллагаар 21,6 сая төгрөгийг улс орон нутгийн төсөвт төвлөрүүлсэн “ИХ ЭХЛЭЛ ТРЕЙД” ХХК, 13,5 сая төгрөгийн татвар төвлөрүүлсэн “ОРХОН ОРГАНИК” ХХК  тус тус шалгарлаа. 

Харин 7,2 сая төгрөгийн татварыг улс, орон нутгийн төсөвт төвлөрүүлсэн иргэн Х.Хандсүрэн аймгийн бичил ангиллын шилдэг татвар төлөгч, 1,4 сая төгрөгийн татвар төвлөрүүлсэн иргэн С.Оюунтунгалаг, 283 мянган төгрөгийн татвар төвлөрүүлсэн иргэн М.Ганхүү нар 2021 оны шилдэг татвар төлөгчөөр шалгарав. 

Шилдэг татвар төлөгчдийн шагналыг  Засаг даргын нийгмийн асуудал харицсан орлогч А.Түвшинжаргал, Санхүү, төрийн сангийн  хэлтсийн дарга Н.Бямбацэцэг, Татварын хэлтсийн дарга Б.Цэвээнсүрэн нар гардууллаа.