21 дүгээр зууны техник технологийн дэвшлийн тусламжтайгаар аливаа мэдээ мэдээллийг бид цаг алгасалгүй авдаг боллоо. Тэр дундаа эцэг, эхчүүдэд хандсан сэрэмжлүүлэг, хэвлэл мэдээлэл, олон нийтийн сүлжээгээр тасралтгүй явж байна. Бага насны хүүхдийг ганцааранг нь бүү үлдээ. Ахуйн осол гэмтэлд өртөх аюултай гэж сануулсаар буй.

Бараг л толгойтой болгоны ой тойнд ортол элдэв, ухуулга сурталчилгаа явж байгаа гэхэд хилсдэхгүй. Гэвч илжигний чихэнд алт хийсэн ч сэгсэрнэ, ус хийсэн ч сэгсэрнэ гэдгийг эцэг, эхчүүд өөрсдийн тод жишээгээр харуулж байна.

Хүүхдээ ганцааранг нь орхих, тэр бүү хэл ганц хором ганцааранг нь үлдээхэд аюултай гэж сануулсаар байтал хайхрамжгүй зан гаргаж, хүүхдээ элдэв аюул осолд өртүүлсээр байгаа нь нууц биш. Ядаж холбогдох байгууллагын мэдээллийг сонсоод ойлгодоггүй юм гэхэд өдөр бүр ГССҮТ-д буцалсан усанд түлэгдэн ирж, амиа алдаж байгаа хүүхдүүдийн зовлонг хараад ойлгомоор юм.

Энэ талаархи мэдээлэл хэвлэл мэдээллээр хангалттай л гарч байгаа.  Хүүхэд нь түлэгдэж, ГССҮТ-д хүргэгдэн ирсэн нэгэн ээж “Хэсэгхэн зуур дуг хийх хооронд...” гэж хариулж байсан удаатай. Энэ мэтчилэн эцэг, эхчүүдийн хайхрамжгүй, хэнэггүй байдлаас болж өдөр бүр бага насны хүүхэд халуун усанд шалжлагдаж, амиа алдсаар байна.

Өчигдөр л гэхэд хоёр хүүхэд халуун тогоотой шөлөнд түлэгдэн ГССҮТ-д хүргэгдэн иржээ. Тодруулбал, гэртээ халуун тогоотой шөлөнд цээж нуруу, бөгсөн хэсгээрээ түлэгдсэн нэг настай хүүхэд ирсэн байх юм. Мөн гэртээ ширээн дээр байсан халуун савтай цай татаж асгаад хүзүү, цээж, баруун өвдөг нь түлэгдсэн гэх нэг настай хүүхэд ч тус эмнэлэгт хүргэгдэн эмчлүүлж байгаа ажээ.

Ганцхан өдрийн жишээг дурьдахад л ийм байна. Сүүлийн үед халуун ус, тогоотой шөлөнд түлэгдэж, шархаа даалгүй амиа алдсан хүүхдийн тоо  нэмэгдсэн гэдгийг ч холбогдох байгууллагынхан мэдээлсээр байна. Нэгэнт л хүүхэд төрүүлсэн юм чинь хариуцлагаа ухамсарлаж, хүүхэддээ анхаарал халамж тавьж байвал дээрсэн. Заавал хүүхдээ халуун усанд шалзалсан  хойноо харамсаж суух хэрэг байна уу.