Hийслэлээс алсгүй байрлах Өгий нуурыг жил бүхэн цөөнгүй аялагч зорьдог. Тэгвэл өнгөрөгч наадмын өдрүүдэд Өгий нуурыг зорьж, нуурын ус руу орсон иргэдийн бие дээр тууралт гарчээ. Бие дээр нь тууралт гарсан иргэд энэ талаар цахим сүлжээнд бичиж, илэрхийлсэн байна. Тэрээр энэ талаар "Өгий нууранд сэлж байгаад гарч иртэл тэсэхийг аргагүй бие загатнаад, жижигхэн юм туурсан. Цэвэр усаар биеэ зайлаад, харшлын эм, тос түрхсэн. Тухайн үедээ бага зэрэг намдсан ч удалгүй дахиад л гарч эхэлсэн. Хамт усанд орсон хүмүүсийнх дээр ч тууралт гарсан" гэжээ. Түүний уг мэдээлэл дээр ижил шинж тэмдэгтэй хүмүүс сэтгэгдэл үлдээж, шалтгааныг нь сураглаж байна. Өгий нуурнаас болсон эсэхийг шинжилж, шалгасан эсэхийг бид Экологийн цагдаагийн алба болон Усны газраас тодруулахад "Бид мэдээлэлгүй байна" гэх хариулт өгсөн юм. 

Манай сурвалжлах баг Өгийн нууранд ороод тууралт гарсан гэх өгүүлэмжтэй гэр бүлийнхэнтэй уулзаж тус асуудлыг тодрууллаа.

Иргэн Н "Нуурын усанд орсны дараа бүх бие тэсэхийн аргагүй загатнасан. Зургаан хүн явсан. Бүгдийнх нь бие дээр тууралт гарч, маажсан. Тухайн үедээ цэвэр усаар зайлаад арай дээр болсон. Өнөөдөр өглөө биеийн бүх хэсгээр дахиад тууралт гарч эхэлсэн" гэв. 

Баянгол дүүргийн иргэн Г.Пагмасүрэн "Өгий нуураас гарч ирсний дараа шууд бие загатнасан. Удалгүй улаан тууралт гарч эхэлсэн. Тухайн үед тэнд байсан хүмүүс ч бие нь загатнаад, тууралт гараад байна гээд айчихсан байсан" гэв. 

 Биеэр нь тууралт гарсан цөөнгүй иргэн Арьсны өвчин судлалын үндэсний төвд хандсан байна.  Энэ шалтгаанаар тус эмнэлэгт баяр наадмын өдрүүдэд өдөрт 3-10 тохиолдол бүртгэгджээ. Энэ талаар Арьсны өвчин судлалын үндэсний төвийн Арьсны эмч Д.Лхагвасүрэн "Өгий нууранд гэр бүл, найз нөхдөөрөө аялаад ирсэн хүмүүст тархмал, хатуу арьсны түвшнээс доош улайсан тууралт гарсан тохиолдол нэлээд бүртгэгдсэн. Найман хүн аяллаа гэхэд зургаад нь тууралт гарах тохиолдол элбэг байсан. Бид шаардлагатай эмчилгээ, зөвлөгөө өгч ажилласан. Манай Арьсны өвчин судлалын үндэсний төвийн хүлээн авахаар баяр наадмын өдрүүдэд хоногт 50-90 хүн үйлчлүүлсэн" гэв.