"GAM3RS_X" болон "GRID"-ээс зохиож буй "Thunderpick World Championship 2024" тэмцээн болж байна. Тус тэмцээний шагналын сан 850 мянган ам.доллар бөгөөд Монголоос урилгаар "The MongolZ" баг тоглож байна.

Шөвгийн дөрвөн багийн дотоод сүлжээний тэмцээн Герман улсын Берлин хотын "LVL Dome Arena" цэнгэлдэхэд болж байгаа бөгөөд өнгөрсөн шөнө "The MongolZ" Францын 3DMAX багийн эсрэг тоглож 2-0 (anubis 13-6, ancient 13-9) харьцаагаар манай баг хожиж аваргын төлөө шалгарч үлдлээ. Тэд өнөөдөр шөнө 00:30 цагт 500 мянган ам.долларын төлөө Норвегийн "Herioc" багтай тоглоно. 

Манай баг В хэсэгт багтсан бол хэсгийн шатны эхний тоглолтоо өнгөрсөн шөнө Оросын "Cloud9" багийг 2-0 (Dust II 13-11, Ancient 13-11) харьцаагаар хожиж, дараа нь Британийн "Fnatic" багийг 2-0 (Mirage 13-11, Dust II 13-7) харьцаагаар хожиж хэсгээ тэргүүлэхээр болжээ.

Манай багийн бүрэлдэхүүнд дасгалжуулагчаар Баянбатын Эрдэнэдалай /maaRaa/, багийн ахлагч Бямбасүрэнгийн Гарьдмагнай /bLitz/, Мөнхболдын Содбаяр /Techno4K/, Банзрагчийн Өсөхбаяр /910/, Батболдын Аюуш /mzinho/, Мөнхболдын Азбаяр /Senzu/ нар тоглож байна.