ХӨСҮТ-өөс томуу, томуу төст өвчин болон менингококкт халдварын нөхцөл байдлын талаар мэдээлэл өглөө.

ХӨСҮТ-ийн Эрт сэрэмжлүүлэг, хариу арга хэмжээний нэгжийн дарга О.Сувдмаа" Улсын хэмжээнд томуу, томуу төст өвчний идэвхжил алаг цог дэгдэлтийн түвшинд байна. Сүүлийн долоо хоногт амьсгалын замын А хүрээний H1N1 вирус, амьсгалын замын синцитиаль вирус орчилд давамгайлж байна.

Эдгээр вирусийн гол онцлог нь бага насны хүүхдүүдэд хүндрэл үүсгэх эрсдэлтэй байдаг. Амьсгалын дээд замд байршаад, тодорхой хугацааны дараа амьсгалын доод замын эрхтнүүдийг гэмтээх, цаашлаад хатгалгаа болон бачуурал буюу ларенгит болох эрсдэлтэй. Иймд эцэг, эхчүүд онцгой анхаарах хэрэгтэй. Түүнчлэн, БГД, БЗД-ийн менингококкт халдварын сэжигтэй тохиолдлууд лаборатори болон эмнэл зүйгээр үгүйсгэгдсэн.

Мөн лабораторийн шинжилгээгээр эмгэг төрөгч илрээгүй. Удахгүй бидний уламжлалт баяр болох гэж байна. Тиймээс урьдчилан сэргийлэх арга хэмжээг сайтар мөрдөх хэрэгтэй. Тухайлбал, хоолойгоо зайлах, амны хаалт зүүх, амны хөндийн архаг үрэвслүүдээ эмчлүүлэх, дотоод орчны цэвэрлэгээг хоёр цаг тутамд хийх нь чухал" гэлээ.