Л.Оюун-Эрдэнэ 2021 оны нэгдүгээр сард Ерөнхий сайдаар томилогдсон. Тэгээд, танхимынхаа Гадаад харилцааны сайдаар Б.Батцэцэгийг томилж байв. Тэрээр 2016-2020 онд Гадаад харилцааны дэд сайдаар ажиллаж ирсэн байдаг. Дараа нь, УИХ-ын 2024 оны сонгуулийн дүнгээр хамтарсан Засгийн газар байгуулахад Б.Батцэцэгийг Гадаад харилцааны сайдаар дахин томилогдсон.

Эндээс харвал, тэрээр Л.Оюун-Эрдэнийг Ерөнхий сайдаар ажиллах цаг хугацаанд нь Монгол Улсын Гадаад харилцааг хамаарч иржээ. Өдгөө Л.Оюун-Эрдэнэ нь огцорсон, Б.Батцэцэг нь одоогоор үүрэг гүйцэтгэгчээр ажиллаж байгаа юм.

Тэгвэл, өчигдөр тэдний зам салав. “The Times”-ийн нийтлэлтэй холбоотойгоор Б.Батцээг байрь сууриа илэрхийлэв. Тэгэхдээ “…“The Times”-ийн эш татсан “сурвалжууд” нь үнэн хэрэгтээ улс төрийн эрх мэдэл, байр сууриа алдаж, өнгөрсөн хугацаанд хийсэн бусармаг үйлдлээ ямар ч үнээр хамаагүй хаацайлах гэсэн этгээдүүд байхыг үгүйсгэхгүй. Тэдний үйлдэл, өөрсдийн эрх ашгийг хамгаалах өчүүхэн сонирхлын дор улс орны нэр хүндийг олон улсын тавцанд унагааж буй нь эх орноосоо урвасан үйлдэл гэж үзэхэд хүргэж байна” гэж мэдэгдэв.

Б.Батцэцэгийн энэ байр суурийг гадаад харилцааны салбарынхан болоод олон нийт хоёр талаас тайлбарлаж байна.

Эхнийх нь “…Дараагийн Засгийн газарт сайдаар үлдэхийн тулд Л.Оюун-Эрдэнийгээ золиослож харууллаа” гэцгээв. Дараагийнх нь, “…Ерөнхий сайд нь огцорч, Засгийн газар нь тарсан Гадаад харилцааны сайдын үүрэг гүйцэтгэгч эрх зүйн хувьд, олон улсын хувьд ийм бодлогогүй алдаа хийж бай­сан тохиолдол Монгол Улсын дипломат албаны түүхэнд байхгүй” гэлээ. 

Хоёр дахь “тайлбар”-ын хувьд олон улс судлаачид, дипломатуудын хүрээнд яригдах дүгнэлт юм. Харин олон нийтийн олонх нь “…Б.Батцэцэг Гадаад харилцааны сайдаараа үлдэх гавьяагаа байгуулж харууллаа” гэж ойлгоод хоцорлоо. Ерөнхий сайд Г.Занданшатарын зарлах Засгийн газрын бүрэлдэхүүнийг харж байя даа.

Эх сурвалж: “Зууны мэдээ” сонин

2025 ОНЫ ЗУРГААДУГААР САРЫН 17. МЯГМАР ГАРАГ. № 112 (7609)