Төрийн өмчийн хорооноос “Эрдэнэт” үйлдвэрийн шинэ томилгооны асуудлаар өнөөдөр мэдээлэл хийлээ. Мэдээллийн эхэнд ТӨХ-ны дарга Ц.Ням-Осор  “Эрдэнэт” үйлдвэрийн төлөөлөн удирдах зөвлөл бүрэн томилогдож дууссаныг онцолсон юм.

Тэрбээр “Эрдэнэт үйлдвэрийн 49, 51 хувьтай холбоотой асуудал өнгөрсөн хоногуудад нэлээд яригдлаа. Одоогийн байдлаар уг үйлдвэрийн төлөөлөн удирдах зөвлөлийн гишүүд болон даргыг сонгож дууссан. Монгол Улсын Засгийн газрын 51 хувийг төлөөлж У.Бямбасүрэн, Д.Дэмбэрэл, Г.Нандинжаргал, Н.Доржсэмбэд нар томилогдсон. Харин 49 хувийг төлөөлж “Mongolian Copper Corporation”-оос О.Орхон, Д.Ганболд, М.Мөнхбаатар нар ТУЗ-д орсон” гэв.

Харин “Эрдэнэт” үйлдвэрийн ТУЗ-ийн даргаар Засгийн газрын хэрэг эрхлэх газрын дэд дарга У.Бямбасүрэн ажиллах юм байна. Мөн одоогоор тус үйлдвэрийн Ерөнхий захирлыг томилох асуудал үлдсэн бөгөөд Засгийн газраас томилох ажээ.