Өмгөөлөгч О.Анхбаяр өөрийн цахим хуудсандаа нийтэлжээ. Тэрбээр

"Цагдаагийн байгууллага ямар ч тохиолдолд иргэн таны гомдол мэдээллийг шууд хүлээн авах үүрэгтэй.

Зүгээр үүдний жижүүр цагдаагаас даргаа хүртэл "энэ манай харьяалал биш, та шүүх рүү яв, та тэр цагдаа руу яв" гэж хэлэх эрх байхгүй. Үнэхээр өөрсдийнх нь шалгах гомдол биш байсан ч хүлээн авах үүрэгтэй төдийгүй анхан шатны шалгалт ажиллагааг хийгээд нээрэн манай шалгах асуудал биш гэдэг нь ийм ийм баримтаар нотлогдож байх тул гээд шалгах ёстой газар луу нь харьяаллын дагуу шилжүүлэх ёстой, хууль нь тийм юм.

Хэрэв таны гомдлыг хүлээж авахаас цааргалсан, хүлээж авалгүй буцаасан, таны өөдөөс мэтгэлцэж мохоосон бол бүгд хууль зөрчсөн үйлдэл төдийгүй, цагдаагийн ёс зүйн зөрчил юм. Цагдаагийн ёс зүйн дүрмэнд энэ бүгд хориотой байдаг. Та ЦЕГ-ын 126 гээд тусгай утас руу залгаж гомдлоо хэлдэг байгаарай. Тусгай утас 126 нь тоохгүй бол засгийн газрын 1111 тусгай дугаарт гомдлоо хэлээрэй. Бүр болохгүй бол цагдаа хэрхэн таны гомдлыг хүлээж аваагүй тухай тайлбарлан бичээд гомдлоо хавсаргаад харьяа дүүргийн прокурорын газар луу шуудангаар илгээгээрэй. Прокурор таны гомдлыг шалга хэмээн цагдаа руу шилжүүлдэг. Энэ үед цагдаа шалгахаас өөр замгүй болдог.

Эцэст нь хэлэхэд иргэн аврал эрээд өөрт хамгийн ойрхон цагдаад хандах бүрэн эрхтэй, цагдаа шууд тэр дор нь гомдол хүлээн авах ёстой ба тэр даруй шуурхай ажиллах үүрэгтэй. Ийм ч учраас цагдаагийн байгууллага дүүрэг бүрт, хороо бүрт байдаг. Түүнээс төв хэлтэс рүү яв, 102 луу дуудлагаа өг гэж хэлэх эрх цагдаа нарт байхгүй." хэмээсэн байна.