Өнгөрсөн амралтын өдрүүдэд их хэмжээний цас орж, авто зам хаагдаж, замын хөдөлгөөнд саад учирсан. Их хэмжээний цас орсны улмаас иргэд хөдөө орон нутгийн замд машинтайгаа цасанд суух, төөрөх зэрэг асуудал гарч байгааг Онцгой байдлын ерөнхий газраас мэдээллээ.

Тодруулбал, энэ сарын 5-6 шилжих шөнийн 02:46 цагт Дархан-Уул аймгийн Орхон сумын III дугаар баг, Хамар даваан дээр дотроо хоёр хүнтэй “X-Trail” загварын автомашины кроп нь эвдэрсэн, тусламж үзүүлнэ үү гэх дуудлага иржээ.

Дуудлагын дагуу тус аймгийн Онцгой байдлын газрын гурван албан хаагч ажиллаж, гурван иргэнийг аварч, эвдэрсэн автомашиныг зөөвөрлөж Дархан хотын төвд авч ирсэн байна. Мөн Сэлэнгэ аймгийн Сайхан сумын Номгон багийн Хийдийн өвөр газар /Сумын төвөөс зүүн зүгт 25 километрт/ “PRA-DO” загварын автомашинтай таван хүн Дархан-Уул аймаг руу бямба гарагийн 19:00 цагт гараад сураггүй болсон гэх дуудлага иржээ. Дуудлагын дагуу Онцгой байдлын газрын эрлийн баг ажиллаж байна. Дээрх таван хүнийг олоогүй бөгөөд эрлийн ажиллагаа үргэлжилж байгаа ажээ.