С.Зориг агсны хөшөөг 2026 оны долдугаар сарын 30-31-нд шилжих шөнө дунд МОАХ-ны байр руу нууцаар нүүлгээд маргааш нь олон нийтийн шүүмжлэлтэй тулаад буцааж хуучин сууринд нь байрлуулсан. Энэ үйл явдлын дараа АН-ынхан 1990-ээд оны үед тухайн үеийн Сайд нарын зөвлөл, Улаанбаатар хотын АДХГЗ-ны шийдвэрээр ардчиллын чиг баримжаатай МСДН, МоАН, МҮАН-д тус тус олгосон байрны асуудлаа сөхөж хоорондоо хэрэлдсэн. Харамсалтай нь өдгөө эдгээр байрнуудын аль нь ч АН-д үлдээгүй бөгөөд Монголын том компанийн захирлууд худалдаад авчихсан.

Өөрөөр хэлбэл, С.Зориг агсны хөшөө ар талд нь байрладаг МҮАН-ын байрыг газартай нь “Бодь”-ийн Д.Баясгалан худалдаж авчээ. Тэндээ тауэр барих зураг төслийг гаргаад ажлаа эхлэхээр төлөвлөсөн байна. Ингээд хөшөөг МоАХ-ын байр руу нүүлгэсэн нь бүтэлгүйтсэн хэрэг. Саяхнаас АН-ын эх сурвалжууд “Манай МоАХ-г С.Зориг агсны хөшөөг нүүлгэн шилжүүлсэн гэх гүтгэлэг тарсан. Хөшөөг нүүлгэн шилжүүлсэн нь МоАХ-нд ямар ч хамаагүй бөгөөд ямар ч гэм буруугүй юм байна. Харин тийм хүсэлт тавьж буй байгууллага нь чөлөө зөвшөөрлийг нь авчихсан мэтээр андуу ташаа ойлгуулж, буруу мэдээллээр хангаж залилан мэхэлсэн шахуу нэг үйлдэл гаргажээ” гэв.

Түүнчлэн, С.Зориг агсны хөшөөг шөнө дөлөөр нүүлгэсэн асуудлаар НЗДГ дээр нэлээд яригдаж, Нийслэлийн Засаг дарга Б.Пүрэвдагва уг хөшөөг нүүлгэх зөвшөөрөл олгосон “хэрэг”-ээр Сүхбаатар дүүргийн Засаг дарга М.Алтангэрэлийн гурван сарын цалинг хасаж шийтгэсэн. Гэтэл Сүхбаатар дүүргийн Засаг дарга С.Зоригийн хөшөөг нүүлгэх зөвшөөрлийг огт өгөөгүй болж таарав. Тэрээр зөвхөн “Хууль дүрмийн хүрээнд нүүлгэн шилжүүлэхэд татгалзах зүйлгүй” гэх агуулгатай бичгийг хийж өгсөн байна. Ингээд хөшөөг нүүлгэсэн буруутан ч үгүй, уг зөвшөөрлийг өгсөн эзэн ч үгүй болж таарав.

Эх сурвалж: “Зууны мэдээ” сонин

2026 ОНЫ НАЙМДУГААР САРЫН 11. МЯГМАР ГАРАГ. № 148 (7890)

Хуурамч мэдээлэл хаа сайгүй тархах болсон энэ үед баримттай, эх сурвалжтай, үнэн бодитой мэдээллийг “Зууны мэдээ” сониноос аваарай.

Үнэн мэдээллийг хамтдаа хамгаалцгаая.

Бие даасан сэтгүүл зүйг дэмжин "Зууны мэдээ" захиалаарай. www.zuuniimedee.mn