Одоогийн УИХ-ын 126, тэр дундаа эмэгтэй гишүүд дундаа цэгцтэй, тулхтай, зөв гишүүдийн нэгээр УИХ-ын гишүүн П.Батчимэг нэрлэгддэг. Тэрээр Орос хэлний багшийн дээд сургуулийг дүүргээд Цагдаагийн академид багшилсан. Удирдлагын академийг төгсөөд БСШУЯ-нд мэргэжилтнээр ажилласан. НИТХ-д 2008 оноос хойш гурав дараалан сонгогдож ажилласан. Дараа нь УИХ-ын 2024 оны сонгуулиар гишүүн болсон. Үндсэндээ, мерит зарчмаар явсаар УИХ-д орж ирсэн. Энэ замнал нь нөлөөлдөг үү, чуулган дээр, ер хаана ч сул үг унагана гэж бараг үгүй. Тэрээр энэ УИХ дахь хүүхэд, эмэгтэйчүүд, боловсрол, ядуурлыг бууруулж, үйлдвэр, ажлын байрыг дэмждэг, мөн бизнесийн орчныг сайжруулах, чөлөөт зах зээлийг хөгжүүлэх дээр дориухан дуугардаг гишүүдийн нэг юм. УИХ-ын 2026 оны хаврын чуулганаар л гэхэд Замын хөдөлгөөний аюулгүй байдлын тухай хуульд нэмэлт өөрчлөлт оруулах тухай хуулийн төсөл дээр ажиллаж батлуулсан. Уг хуулиар скүүтэр, мопед, суррон унахад тавигдах шаардлага, дээрх “тээврийн хэрэгсэл”-үүдийг нийтийн хэрэгцээнд нийлүүлэгчдийн эрх, үүрэг, бас эдгээрийг жолоодож зөрчил гаргасан этгээдүүдэд хүлээлгэх хариуцлага зэргийг тусгасан байна. Үүнээс гадна, Нийгмийн даатгалын ерөнхий хуульд нэмэлт өөрчлөлт оруулах тухай, Хувь хүний орлогын албан татварын тухай хуульд нэмэлт өөрчлөлт оруулах тухай, Ойн тухай хуулийн шинэчилсэн найруулгын төсөл, Дулаан хангамжийн тухай анхдагч хуулийн төсөл зэрэг дээр гишүүдтэй хамтран ажиллаж УИХ-д өргөн мэдүүлжээ.

Түүнчлэн П.Батчимэг гишүүнд цахим сүлжээнд идэвхтэй байдаг. Уг “суваг” хааяа үзэл бодлоо илэрхийлнэ. Харин сүүлд, 2026 оны долдугаар сарын 24-нд үзэл бодлоо илэрхийлсэн нь олны анхаарлыг татаж багагүй шүүмжид өртөөд байна. Тэрээр “Эр эмгүй архи “гударч”, амаар нь цутгасан мэт царайлж, гөлийж гөлтийгөөд жолоо барьж, хүн “алаад” байгааг харахаар үнэхээр хэцүү болжээ. Замын осол, үхэл хагацал дийлдэхээ байлаа. Дайн дажин болов уу, найр наадам болов уу. …Архиа өөрсдөө бүр бэлдэж аваад гарна, ууна. Бүр зорьж авч зохион байгуулалттай ууна, согтоно, дэвнэ сэвнэ. Хамт уух эр, эмээ дорхноо олчихно. Согтуу галзуу давхиж яваад бүхэл бүтэн айлыг гэр бүлээр нь сүйтгээд баахан өнчрөл хагацал, уй гашууд автуулна. Харсан дуулсан нэг хэсэг нь халаглаад нийтээрээ бүгд дөжирчихсөн. Их л сайндаа эвийлээд гаслаад тэр дороо мартана. Шөнөжин давхилдана, сүлжилдэнэ. Согтуу хөлчүү нь орилно. Солгой хоолойгоор дуулна. Энэ их дуу чимээтэй улсын маань нийслэл Улаанбаатар хот одоо амрах амсхийх болоогүй юу. Унтаж амрахгүй яваад сүүлдээ хүүхэд үүхэдгүй бүгд ядаргаандаа оржээ гэх сэтгэл аргагүй төрөх боллоо” гэсэн юм. Үүнийг нь “Өөрөө архи үйлдвэрлэдэг хүн шүү дээ. АПУ-гийн хувьцаа эзэмшигч байж агсам тавих юм. Та нар архи үйлдвэрлэхээ больчих” гэж олон нтийт шүүмжилцгээв. Учир нь тэрээр “Би АПУ ХК-ийн хувьцаа эзэмшигч” гэдгээ АТГ-т гаргадаг ХОМ-тээ мэдүүлдэг билээ. Тэрээр бас үүнд “нэгдсэн” сэтгүүлчдийг ч орхисонгүй, “Сэтгүүлчид зөв ойлгож зөв сэвээсэй билээ. Архи пиво, аваар ослын сэдэв хөндлөө гээд сүйд болж гэнэ. Ардчилсан нийгэмд үгээ хэлж, үзэл бодлоо аль ч сэдвээр хөндөнө шүү дээ” гэсэн байна.

Эх сурвалж: “Зууны мэдээ” сонин

2026 ОНЫ НАЙМДУГААР САРЫН 11. МЯГМАР ГАРАГ. № 148 (7890)

Хуурамч мэдээлэл хаа сайгүй тархах болсон энэ үед баримттай, эх сурвалжтай, үнэн бодитой мэдээллийг “Зууны мэдээ” сониноос аваарай.

Үнэн мэдээллийг хамтдаа хамгаалцгаая.

Бие даасан сэтгүүл зүйг дэмжин "Зууны мэдээ" захиалаарай. www.zuuniimedee.mn