Том оврын автобусанд суухад тасалбар түгээгч гэгдэх ааш ихтэй нөхөд угтдаг байсан цаг ард хоцорч, ухаалаг системд шилжээд буй. Иргэд цахим картаа уншуулаад л автобусаар зорчдог болсон. Энэ хэрээрээ тасалбар түгээгч нь орлогоосоо хумсалдаг гэх явган яриа ч алга болж, автобус алдагдалтай байна гэж гон гон дуугарагчид ч байхгүй боллоо. Иргэд автобусныхаа картыг 5, 10 мянган төгрөгөөр цэнэглээд л хэд хоногтоо сэтгэл амар автобусаар зорчиж байгаа.

Нөгөө талаар дамжин суулт үнэгүй болчихсон болохоор иргэд автобусныхаа картыг авч, аль болох микрогоор зорчихоо больсон. Ер нь хүн бүр том оврын автобусанд суух сонирхолтой болчихоод байгаа. Энэ бол ухаалаг системд шилжсэний хамгийн том давуу тал. Тэр давуу талыг авчирч байгаа хамгийн гол түлхэц нь дамжин суулт үнэгүй болсон явдал.

Гэтэл сүүлийн үед зарим автобусны дамжин суултын карт уншуулах төхөөрөмж нь ажил­лахгүй байх тохиолдол багагүй гарах боллоо. Нэг бол эвдэрсэн, эсвэл элдэв зүйл уншиж байна гээд буух үед карт унших боломжгүй болчихоод байгаа юм. Мэдээж зарим тохиолдолд эвдрэх, гэмтэх тохиолдол гардаг л байх.

Гэхдээ л өглөө гарахдаа автобуснууд бүрэн бүтэн байдлаа шалгаад, шалгуулаад гардаг. Хэрвээ карт уншигч нь эвдэрсэн, саатал энэ тэр гарсан байвал засуулаад явах ёстой. Нөгөө талаар суух үед карт уншдаг төхөөрөмж нь огт эвдэрсэн, янз бүр болсон тохиолдол гарсантай нэг ч тааралдаж байгаагүй юм байна.

Ингээд бодохоор том оврын автобусны үйлчилгээ эрхлэгчид зарим тохиолдолд иргэдийг хохироогоод байгаа юм биш үү. Өглөө гарахад нь хоёр, гурван автобусны карт уншигчид асуудал үүсч, багахан доголдсон байгааг мэдсээр байж засдаггүй байвал яах вэ. Энэ асуудлыг холбогдох газрууд нь шалгаж, шаардлага тавьж байх хэрэгтэй байна. Мэдээж олон автобусанд ийм доголдол үүсээд байгаа юм биш. Цөөн тооны автобуснуудын цахим карт унших систем нь доголдоод, янз бүр болоод байгаа.

Гэхдээ цөөн тооны автобус гэхээр нэг чиглэлийн автобус л байнга тэгээд байна гэж ойлгож болохгүй л дээ. Цөөн тохиолдолд, өөр өөр чиглэлийн янз бүрийн автобусны буух карт уншигч нь доголдоод байгаа юм. Бүр жаахан хардвал, ээлжлээд доголдуулаад, үгсэн хуйвалдаад байгаа юм биш биз дээ. Дамжин суулт нь ажиллахгүй бол иргэд дахиад мөнгө төлөх болно. Мэдээж автобусны компаниудад л ашигтай. Тэгээд ч дамжин суулт үнэгүй болсон цагаас иргэд түрүүлж ирсэн аль нэг автобусанд суугаад, хоёр дамжаад явчихдаг болсон. Нэг талаараа автобус хүлээж даарч зогсохгүй, цаг хэмнэх сайн талтай.

Тиймдээ ч дамжин суух тохиолдол их байгаа. Ийм үед нэг өдөр л цөөн хэдэн автобус буухад карт уншуулдаг төхөөрөмжөө жаахан доголдуулахад бусаддаа хөөрхөн хэдэн төгрөг оруулаад өгчихөж байгаа юм. Нэг үгээр хэлбэл, цөөнгүй хэдэн автобусны орлого бага ч болов төгрөгөөр нэмэгдэнэ л гэсэн үг. Тиймээс л албаар доголдол үүсгээд байгаа юм биш биз дээ гэж хардаад байгаа хэрэг. Мэдээж ингээд бичихээр холбогдох байгууллагууд нь биднийг худлаа гүтгэлээ гэх байх. Яг тэгсэн гэж гүтгээгүй шүү. Зүгээр л буух карт унших төхөөрөмж нь ямар нэг байдлаар саатсан тохиолдолтой цөөнгүй таарсан болохоор л ингэж хардаад байгаа хэрэг. Тэгээд ч буух карт уншигч нь ажиллахгүй бол иргэд дамжин суухдаа үнэгүй үйлчлүүлэхгүй хохирч л таараа шүү дээ. Санамсаргүйгээр тийм алдаа гараад байдаг бол өглөө үйлчилгээнд гарахаасаа өмнө засчихаж байгаа ч ээ.