Зээлжих зэрэглэл тогтоогч “Moody’s” агентлаг манай улсын зээлжих зэрэглэлийг B3 ангилалаас нэг шатаар бууруулж, Caa1 хүртэл бууруулснаа өнгөрөгч баасан гарагт зарласан юм.  Ирэх хоёр жилийн хугацаанд Засгийн газар өрөө хэрхэн төлөх нь тодорхойгүй, түүнчлэн өрийн хэмжээ нэмэгдэх хандлагатай гэж үзсэний үндсэн дээр  тус агентлагийн мэргэжилтнүүд ийнхүү зээлжих зэрэглэлийг бууруулсан аж.

Тэгвэл Монгол Улсын Засгийн газар, Монголбанк хамтарсан мэдэгдэл хийж, манай улсын зээлжих зэрэглэлийг нэг шатлал бууруулсныг бодит байдалтай нийцэхгүй гэж үзэж буйгаа илэрхийлсэн байна.

Тэдний зүгээс эдийн засгийг богино хугацаанд тогтворжуулах цогц арга хэмжээг авч хэрэгжүүлж буй гэдгээ дурьдаад,  шат дараатай үйл ажиллагаа хийгээд өнөөгийн зах зээлийн байдалтай холбоотойгоор Монгол Улсын эдийн засгийн байдал богино хугацаанд тогтворжиж, цаашдын төлөв эерэг болохоор байгааг онцолсон байна.