АНУ-ын Ерөнхийлөгчийн сонгуульд Бүгд найрамдах намаас үл хөдлөх хөрөнгийн тэрбумтан  70 настай Доналд Трамп, Ардчилсан намаас Төрийн нарийн бичгийн дарга Хиллари Клинтон нар нэр дэвших нь тодорхой болсон. Тэгвэл тэдний өрсөлдөөн эдүгээ ширүүсч, нэг нэг рүүгээ хатуу үг чулуудах болов.

Тодруулбал, Нью-Йорк хотын иргэдтэй хийсэн уулзалтынхаа үеэр Доналд Трамп өрсөлдөгч Хиллари Клинтоныг “Хамгийн аймшигтай авлигач байж болзошгүй” гэж тодорхойлжээ. Тэрбээр “Энэ дэлхийд худалч хүн маш олон. Гэхдээ Хиллари  Ерөнхийлөгчийн сонгуулийн түүхэн дэх хамгийн авлигач хүн байж магадгүй” гэж хэлсэн нь олон улсын хэвлэл мэдээллийн анхаарлыг татлаа.

Үүнээс нэг хоногийн өмнө Төрийн нарийн бичгийн дарга асан Хиллари Клинтон Доналд Трампын эдийн засгийн бодлогыг шүүмжилж, “Трамп уналт” гэж маш товчоор тодорхойлсны хариу үйлдэл гэж ажиглагчид тайлбарлаж байна. Энэ мэтээр долдугаар сард болох хурлаар намууд нэр дэвшигчдээ зарлахаас өмнө өрсөлдөгчгүй үлдсэн хоёр нэр дэвшигч нэг нэгийнхээ эсрэг мэдэгдлийг хийж, өрсөлдөөн ширүүссээр байна.