АНУ-ын Ерөнхийлөгчийн сонгуульд ялалт байгуулж, тус улсын 45 дахь Ерөнхийлөгчөөр тодорсон үл хөдлөх хөрөнгийн тэрбумтан Доналд Трамп ирэх баасан гарагт тангаргаа өргөнө.  Ингэснээр Барак Обамагийн бүрэн эрхийн хугацаа дуусгавар болж, БНН АНУ-ын бодлого тодорхойлох бүхий л дээд байгууллагад ноёрхох юм. Тэгвэл шинэ Ерөнхийлөгчийн тангараг өргөх ёслолын сургуулилт саяхан болжээ. Нийслэл  Вашингтон ДС хотод байрлах Капитолын ордны  өмнөх индэр дээр тангаргийн сургуулилт болж, цэргийнхэн оролцсон байна.

Сургуулилтын үеэр Ерөнхийлөгч Доналд Трамп, дэд Ерөнхийлөгч Майкл Пенс нартай гадаад төрхөөрөө тун ижил эрхмүүд тэдний үүргийг гүйцэтгэн баруун гараа өргөн тангараг өргөж, тус ёслолын үйл ажиллагааны журам, зарцуулагдах хугацааг нарийн тооцон баталжээ.  АНУ-ын шинэ Ерөнхийлөгчийн тангаргаа өргөх ёслолын үйл ажиллагааны үеэр Капитолоос Цагаан ордон хүртэлх автозамд зохицуулалт хийж, парад алхах гэнэ.

Энэхүү үйл ажиллагаанд 700-900 мянган хүн оролцоно гэсэн тооцоо гарчээ. Гэвч эсрэгээр 100 гаруй байгууллага жагсаал зохион байгуулахаар төлөвлөсөн учир 28 мянган цагдаа цэргийн алба хаагч бэлэн байдалд ажиллах юм байна. Түүнчлэн, Трампын тангараг өргөх ёслол сонгуулийн сурталчилгааны үеэр дэвшүүлсэн “Америкийг дахин аугаа гүрэн болгоно” гэх уриан дор зохион байгуулагдах аж.

Үл хөдлөх хөрөнгийн тэрбумтан Ерөнхийлөгчийн хувьд өмнө нь сонгуульд ялж байсан туршлагагүй учир тангараг өргөх ёслолын өмнөх өдөр Цагаан ордны өмнөх Блейр хауст ирж хонох юм байна. Улмаар ёслолын өглөө хамгийн түрүүнд сүмийн мөргөлд оролцож, дараа нь эхнэр Мелани Трампын хамт Цагаан ордонд зочилж, Барак Обамагийн гэр бүлтэй хамтдаа цай ууж цагийг өнгөрүүлснийхээ дараа тангараг өргөх ёслол болох капитолын ордны өмнөх талбай руу явах ажээ.

Ёслолын үйл ажиллагаа энэ сарын 20-ны өдрийн 11:30 цагаас эхэлж, Майкл Пенс дэд Ерөнхийлөгчийн тангараг өргөсний дараа Доналд Трамп Ерөнхийлөгчийн тангаргаа өргөх юм байна. Ийн ёслолын үйл ажиллагааг зохион байгуулсны дараа Доналд Трамп албан ёсоор АНУ-ын 45 дахь Ерөнхийлөгч болж, бүрэн эрхийнх нь хугацаа эхэлнэ.  Түүнчлэн, бизнесмэн эр илтгэл тавих бөгөөд энэ үеэр сонгуулийн кампанитын үеэр гүн гүнзгий хуваагдсан ард түмнээ дахин нэгдэхийг уриалах төлөвтэй байгааг ажиглагчид онцолж байгаа юм.  Үүний дараа Барак Обама Ерөнхийлөгчийн хэрэглээний нисдэг тэргээр ёслолын үйл ажиллагааг орхино.

Улмаар Капитолын ордонд шинэ Ерөнхийлөгч, тэргүүн хатагтай нарыг урьж, төр засгийн өндөр албан тушаалтнуудын хамт үдийн зоог барьсны дараа Д.Трамп гэргийнхээ хамт Цагаан ордон хүртэл парадаар явах гэнэ. Шинэхэн Ерөнхийлөгчийн суусан машины цуваа болон 8000 орчим урлаг, соёлынхны парад Цагаан ордон хүртэлх тусгайлан зохицуулалт хийсэн замаар үргэлжлэх ажээ. Найман жилийн өмнө Барак Обамаг тангаргаа өргөх үед парад гурван цаг орчим үргэлжилж байсан бол Трамп нэн даруй үүрэгт албандаа томилогдож, зорилго зорилтоо хэрэгжүүлж эхлэхийг хүсч буй учраас хугацааг богиносгож, парад цаг гаруй хугацаанд л үргэлжлэх юм байна. 

Түүнчлэн, ёслолд үе үеийн Ерөнхийлөгчид бараг бүгд оролцохоо илэрхийлсэн бол конгрессын доод танхимын Ардчилсан намын зарим гишүүн оролцох боломжгүй гэдгээ илэрхийлсэн байгаа юм. Хамгийн анхаарал татсан нэг асуудал нь ёслолын үеэр Трампыг дэмжигч болон эсэргүүцэгч гэсэн 100 гаруй байгууллага жагсаал хийхээр төлөвлөсөн явдал юм. Улмаар энэ үеэр мөргөлдөөн гарахаас сэргийлэх зорилгоор 28 мянган цагдаагийн алба хаагч бэлэн байдалд ажиллах ажээ.