ОХУ-ын Ерөнхийлөгч В.Путин АНУ-ын 45 дахь Ерөнхийлөгч Доналд Трампын Москвагийн зочид буудлын нэг өрөөнд биеэ үнэлэгчтэй байсан нууц бичлэгийг тагнуулынхан гартаа оруулсан гэх CNN –ын мэдээлэлд хариулт өгчээ. Сэтгүүлчдийн асуусан асуултыг  В.Путин тоглоом маягаар хүлээн авч, “Утгагүй юм” хэмээн инээмсэглэн хариулсанаас гадна мэдээлэл тараасан хүн нь “Биеэ үнэлэгчээсээ ч илүү дор юм” гэсэн аж.

ОХУ-ын Төрийн тэргүүн эл мэдээллийн талаар анх удаагаа ам нээсэн нь энэ юм. Энэ сарын 20-нд Ерөнхийлөгчийн тангаргаа өргөх үл хөдлөх хөрөнгийн тэрбумтан Доналд Трамп 2013 онд “Miss Universe” наадмын хүрээнд Москва хотноо айлчлах үед ОХУ-ын Тагнуулын хорооныхон түүнийг ажиглаж байсан гэх мэдээллийг ч эрс үгүйсгэжээ. Энэ тухайд тэрбээр “Москвад айлчлах үед Трамп улс төрөөс ангид байсан. Түүнийг улстөрд орох сонирхолтойг бид мэдээгүй.

Манай тагнуулын байгууллага АНУ-ын баячуудын араас хөөцөлддөг гэж хэлэх гээд байна уу. Мэдээж тийм зүйл байхгүй. Утгагүй юм” гэсэн байна. Мөн “Трамп насанд хүрсэн хүн. Гоо бүсгүйчүүдийн тэмцээнийг зохион байгуулж, дэлхийн хамгийн сайхан бүсгүйчүүдтэй уулзахад бүхий л амьдралаа зориулсан” гэж хэлснээр, АНУ-ын шинэ Ерөнхийлөгчийг  биеэ үнэлэгч дуудах хүн гэж бодохгүй байгаагаа илэрхийлээд амжсан байна.