Жүдо бөхийн 2017 оны насанд хүрэгчдийн улсын аварга шалгаруулах тэмцээн гурав дахь өдрөө үргэлжилж байгаа билээ. Эхний хоёр өдөр эрэгтэй, эмэгтэй тус бүр 7 жингийн аваргууд тодорсон. Тэгвэл өнөөдөр багийн УАШТ боллоо. Өдгөө 5 дахь удаагаа зохион байгуулагдаж буй багийн улсын аваргын эмэгтэйчүүдийн төрөлд алтан медалийн төлөө  “Женко” клубын нэгдүгээр баг “Хилчин”  спорт хорооны нэгдүгээр багтай тулсан.

Энэ барилдаанд “Женко” клубын баг тамирчид өрсөлдөгчөө 3:2-оор буулгаж авч, алтан медаль хүртлээ. 52, 57 кг-ын жинд “Хилчин” спорт хорооны тамирчин Ч.Аззаяа, Олимпийн мөнгөн медальт Д.Сумъяа нар өрсөлдөгчөө дараалан ялсан. Тэгвэл 63 кг-д Б.Мөнгөнчимэг, -70-д Б.Хулан, +78 кг-д Ц.Наранжаргал өрсөлдөгчөө ялснаар “Женко” клубын баг аваргаллаа.

Тэгвэл эхний хүрэл медалийг “Алдар” спорт хорооны баг хүртлээ. Тэд медалийн төлөө “Монголын жүдо академ”-ийн багийг 3:2-оор буулгаж авсан юм. “Алдар” спорт хорооны багаас 52 кг-д Г.Наранцэцэг, 63-т Б.Ганхайч, -70 кг-д Адилцэцэг нар өрсөлдөгчөө ялснаар багийн төрөлд хүрэл медаль хүртлээ.

Харин нөгөө хүрэл медалийн төлөө “Сүлд” спорт хорооны баг “Женко” клубын хоёрдугаар багтай тулсан. Энэ барилдаанд “Сүлд” спорт хорооны баг өрсөлдөгчөө 3:2-оор буулгаж авч, медалийн болзол хангасан юм. Эхний хоёр барилдаанд “Женко” клубын Э.Базаррагчаа, Алтанцэцэг нар ялсан. Тэгвэл сүүлийн гурван барилдаанд буюу 63, -70, +78 кг-д “Сүлд”-ийн н.Лхагвадулам, н.Нямтуяа, н.Мөнхцэцэг нар дараалан ялсан юм.