Хэрэглээнд нэвтэрснээс хойш 10 жил ч болоогүй байгаа фэйсбүүкийн идэвхтэй хэрэглэгчдийн тоо дэлхий даяар тэрбум давжээ. Харин Монголын хэрэглэгчид энд зохих хувь нэмрээ оруулж, хүрээ нь улам тэлсээр 1.8 саяыг нь эзэлдэг байх юм. Тэр дундаа 20-35 насныхан хамгийн идэвхтэй хэрэглэгч байдаг гэсэн судалгаа ч бий. Тэгвэл энэ тооны хүмүүсийн хувийн амьдрал, ажил төрөл, хэдэн хүүхэдтэй, эхнэр, нөхрийг нь хэн гэдэг, хаана ажилладаг, ямар сонирхолтой гэх мэтээр бүхий л мэдээллийг нь фэйсбүүк хуудаснаас нь авч болж байна.

Тухайлбал, тураах бүтээгдэхүүний худалдаа эрхэлдэг нэгэн байлаа гэж бодоход, “Турах юмсан”, “Би хөвсгөр хүн”, “Яана аа, цагаан сар боллоо” гэх мэт пост бичиж, элдэв тураах дасгал шэйрлэх хүмүүсийг онилоход л бүтээгдэхүүнээ хурдхан зарчих жишээтэй. Цагаан сар ч тун удахгүй болох гэж байна.

Энэ үеэр тухайн хүний эцэг, эх нь хэн болох, уг гарвал нь хаанахынх, одоо хаана амьдарч байгаа гэх мэт мэдээллийг мэдэж болно. Сая Валентинаар гэхэд л эхнэр, нөхөр нь хэн болох, тухайн хүн найз залуу эсвэл найз бүсгүйтэй эсэхийг нь манай фэйсбүүкийн идэвхитэй хэрэглэгчид төвөггүйхэн мэдсэн гэхэд хэтийдэхгүй.  Харин сүүлийн үед  Элчин сайдын яамдууд тухайн улс руу аялж, ажиллаж, суралцахаар виз хүсэгчдээр бөглүүлэх маягт дээрээ “фэйсбүүк хаягаа бичнэ үү” гэх шаардлага тавих сураг байх юм. Эндээс тухайн хүний хамгийн үнэн бодитой амьдралыг мэдэж болно гэж үзэж байгаа хэрэг л дээ.   

Манай фэйсбүүк идэвхтэй хэрэглэгчдийн ихэнх нь 20-35 насныхан байдаг гэж дээр дурьдсан. Энэ насны хүмүүс ихэвчлэн гадаадын аль нэг улс орон руу суралцаж, ажиллахаар явах сонирхолтой байдаг.  Тухайлбал, БНСУ-д гэхэд л манай улсын 30 гаруй мянган залуу ажиллаж амьдардаг бөгөөд тэдний  2800 гаруй нь гэрээгээр хөдөлмөр эрхлэгчид байдаг гэх мэдээлэл бий. Зөвхөн БНСУ-д шүү дээ. Дээр нь АНУ-д 25 мянга, БНХАУ-д 8600, Японд 6500, Шведэд  6000 гэх мэтээр залуус дэлхийн олон оронд сурч, хөдөлмөрлөж байгаа билээ.  Тэгэхээр хүмүүс минь нүүрном руугаа хамаагүй бүх амьдралаа дэлгээд байх шаардлагагүй болж байгаа юм биш үү.  

Угаасаа хүн бүр л амьдралын хэмнэлээ сошиал хуудастаа дэлгэх болсон энэ үед тухайн хүнийг судлах хамгийн шалгарсан арга нь фэйсбүүк хаяг болж байгаа нь үнэн шүү дээ. Ялангуяа, манайхан гадаадад  гэрээт ажилтнаар очоод буцалгүй “харлаж”, гэмт хэрэг зөрчилд холбогдох нь нэмэгдэх болсон.  Тиймээс тухайн хүн хэн бэ, ямар ёс суртахуунтай, боловсролтой, үгүй ядахдаа гэр бүлийнхэн нь хэн юм бэ гэдгийг төвөггүйхэн мэдчих боломжтой хойно, энэ аргыг нэвтрүүлэх магадлал өндөр байна. Албан ёсоор байг гэхэд албан бусаар нүүрном шалгадаг болох ч юм бил үү.  

Одоогоор виз мэдүүлэхэд БНСУ-ын Элчин сайдын яамнаас барьцаа таван сая төгрөг байршуулахыг шаарддаг юм билээ. Тус мөнгийг баталгаа болгодог байх. Тэгвэл үүнийхээ оронд фэйсбүүк хаягийг нь мэдчихдэг болбол бүр илүү баталгаа болох болов уу. Хэрэв ингэвэл залуус ч гэсэн өөрийн сошиал хуудастаа элдэв гаж, ёс зүйгүй, бусармаг зүйлсийг постолж, шэйрлэдэггүй болох байх. Нэөгөө талаар фэйсбүүк сүлжээнд дэг тогтох болов уу гэж найдна. Хамгийн энгийнээр бодоход л хэн дуртай нь хүнийг гүтгэн, доромжилж, элдвээр хэлэхгүй, садар самуун зүйл сурталчлахгүй болох вий.